პრემიერმინისტრი, გიორგი გახარია ამბობს, რომ პრეზიდენტის მიერ შეწყალებული გიგი უგულავა და ირაკლი ოქრუაშვილი პირადი მიზნებისთვის ქვეყნის ინტერესებს არ დაინდობენ.

მისი თქმით, ისინი ციხიდან აბსოლუტურად დაუმსხურებლად გამოვიდნენ.

როგორც გახარია ამბობს, მათ შეწყალებაზე საუბარი, მიუხედავად მისი ემოციური პოზიციისა, მეორეხარისხოვანია. რადგან მისი თქმით, "არავის ეგონოს", რომ კოვიდი დამარცხებულია და ქვეყნის ეკონომიკური აღორძინება გარანტირებულია.

ამიტომ მისი განმარტებით, პირველ რიგში მთავრობა მობილიზებულია კოვიდის დასამარცხებლად და მეორე რიგში, ქვეყნის ეკონომიკური აღდგენისთვის და ქვეყანაში არჩევნების წყნარ და მშვიდ ვითარებაში ჩასატარებლად.

"სამწუხარო ამ ყველაფერში არის ის, რომ ბატონები, რომლებმაც ჩაიდინეს კონკრეტული კრიმინალური დანაშაული და არაფრით განსხვავდებიან რიგითი მოქალაქეებისგან, აბსოლუტურად დაუმსხურებლად გამოვიდნენ და იმის მაგივრად, რომ ქვეყანას გვერდით დაუდგნენ, ამასაც პოლიტიკური სპეკულირებისთვის გამოიყენებენ, იმისთვის, რომ პარლამენტში თბილი ადგილებისთვის იბრძოლონ და არ დაინდობენ ქვეყნის ინტერესებს, ათასნაირ სულელურ შეფასებას მისცემენ ამ ყველაფერს. საბოლოო ჯამში კი, ამას გამოიყენებენ პოლიტიკური, ვიწრო, პირადი ინტერესებისთვის", — განაცხადა გახარიამ.