გერმანელი ევროპარლამენტარი ვიოლა ფონ კრამონი აცხადებს, რომ საქართველო რეგიონში ყოველთვის იყო რეფორმების მამოძრავებელი და მთავრობამ ეს როლი ისევ უნდა შეასრულოს. ამის შესახებ მან ევროპარლამენტის საგარეო საქმეთა კომიტეტის სხდომაზე ისაუბრა, სადაც საქართველოს ევროკავშირთან ასოცირების ხელშეკრულების შესრულების საკითხი განიხილება.

"საქართველო რეგიონში ყოველთვის იყო რეფორმების მამოძრავებელი ძალა და მნიშვნელოვანია, რომ ეს შევახსენოთ მთავრობას, რომ მათ უნდა გააგრძელონ ამ როლის შესრულება. [..] რასაც ვხედავთ ისაა, რომ გარკევული ნაწილი 8 მარტის შეთანხმების შესრულდა, თუმცა არა ყველა. ეს ისევ ჩვენზეა დამოკიდებული მხარი დავუჭიროთ, რომ ეს პროცესი გაგრძელდეს და მოხდეს შეთანხმების იმპლემენტაცია. ამასთან, ჩვენ ვხედავთ, რომ პოლარიზება, როგორც პოლიტიკურ სფეროში, ისე საზოგადოებაში იზრდება. ჩვენ მზად ვართ, როცა დრო მოვა და პირობებიც შესაბამისი იქნება, მხარი დავუჭიროთ ქართველ პარლამენტარებს სხვადასხვა ინსტრუმენტებით", — თქვა ვიოლა ფონ კრამონმა.

ევროპარლამენტარი დაეთანხმა კოლეგებს, რომ რასაც ისინი ევროპარლამენტიდან აჟღერებენ, ამას საქართველოსთვის მნიშვნელობა აქვს. მან აღნიშნა, რომ გასულ კვირას, ქვეყანაში ფასილიტატორებმა საკმაოდ კარგად იმუშავეს.