ევროპარლამენტში სოციალ-დემოკრატების წევრის, სვენ მიქსერის განცხადებით, ნათელი უნდა იყოს, რომ ევროკავშირი მხარს არ უჭერს რომელიმე პოლიტიკოსს ან პარტიას. მისი თქმით, ევროკავშირი მხარს უჭერს საერთაშორისო სამართლის ძირითად პრინციპებს. ამ თემაზე მან ევროპარლამენტის საგარეო საქმეთა კომიტეტის სხდომაზე განაცხადა, სადაც საქართველოს ევროკავშირთან ასოცირების ხელშეკრულების შესრულების საკითხი განიხილება.

"როგორც ჩემმა კოლეგამ აღნიშნა, საქართველო არის ქვეყანა, სადაც გვაქვს გავლენა და იმას, რასაც ჩვენ ვამბობთ, აქვს რეალური ეფექტი. ამიტომ მნიშვნელოვანია, ვისაუბროთ იმაზე, რაც ხდება. რა თქმა უნდა, ჩვენ უნდა გავაგრძელოთ საქართველოს მხარდაჭერა. მაგრამ როდესაც ამას ვაკეთებთ, როგორც ევროკავშირი, მნიშვნელოვანია, ნათლად იყოს გაგებული, რომ მხარს არ ვუჭერთ ერთ კონკრეტულ პოლიტიკოსს ან ერთ კონკრეტულ პარტიას. ჩვენ მხარს ვუჭერთ საერთაშორისო კანონების ძირითად პრინციპებს, სწორედ ამიტომ ვუჭერთ მხარს საქართველოს ტერიტორიულ მთლიანობას და სუვერენიტეტს. ასევე მხარს ვუჭერთ ქართველი ხალხის ლეგიტიმურ მისწრაფებას, მათ შორის, მათ სურვილს, დაუახლოვდნენ ევროპას და ევროკავშირის სტრუქტურებს", — თქვა სვენ მიქსერმა.

ევროპარლამენტარმა აღნიშნა, რომ სანამ საქართველო პირველ ივლისს ტურისტებს საზღვარს გაუხსნის, იმედი აქვს, რომ უკვე ნათელი წარმოდგენა ექნებათ, მოხდება თუ არა 8 მარტის შეთანხმების სრულად შესრულება.

სვენ მიქსერი ის ევროპარლამენტარია, რომელმაც საქართველოს ევროკავშირთან ასოცირების ხელშეკრულების შესრულების ანგარიში მოამზადა.

ამავე თემაზე: