ევროპული საქართველო ჰომოფობიასთან, ტრანსფობიასა და ბიფობიასთან ბრძოლის საერთაშორისო დღესთან დაკავშირებით განცხადებას ავრცელებს და აღნიშნავს, რომ ყველა წესიერი ადამიანის ვალია, წინ აღუდგეს ძალადობას და დაიცვას თანამოქალაქეთა უფლებები.

პარტიაში მიუთითებენ იმაზეც, რომ მოქალაქეების ნაწილს დღემდე სიძულვილის, ძალადობისა და შიშის ქვეშ უწევს ცხოვრება.

"სამწუხაროდ, დღემდე ვერცერთმა ხელისუფლებამ ვერ და არ მოახერხა ამ მიმართულებით იმგვარი ნაბიჯების გადადგმა, რაც სიტუაციას მნიშვნელოვნად გააუმჯობესებდა. ხოლო ივანიშვილის გუნდი, როგორც ოპოზიციაში ყოფნისას, ისე ხელისუფლებაში მოსვლის შემდეგ, მფარველობს მოძალადე ჯგუფებს და საკუთარი პოლიტიკური ამოცანებისთვის იყენებს. 2013 წლის 17 მაისის დარბევის დაშვება და მოძალადეთა დაუსჯელობა ამის ნათელი დასტურია", — აღნიშნულია პარტიის მიერ გავრცელებულ განცხადებაში.

ევროპული საქართველო ამბობს, რომ ამ თემით სპეკულირებისა და ძალადობრივი ჯგუფების შეზღუდვა მნიშვნელოვანია ქვეყნის უსაფრთხოებისთვის, რადგან მოძალადეთა აბსოლუტური უმრავლესობა პროპუტინურია და მათ უკან როგორც პოლიტიკურად, ისე ფინანსურად რუსეთი დგას.

"ყველა დემოკრატიული და ღირსეული, პოლიტიკური თუ საზოგადოებრივი ჯგუფის ამოცანაა, გაერთიანდეს როგორც ქვეყნის შიგნით პიროვნული თავისუფლების ისე მთლიანად საქართველოს თავისუფლების დასაცავად", — აღნიშნავენ პარტიაში.

დღეს 17 მაისია, ჰომოფობიასთან, ტრანსფობიასა და ბიფობიასთან ბრძოლის საერთაშორისო დღე. ამ დღეს საქართველოს საპატრიარქო "ოჯახის სიწმინდის" დაცვის დღეს აღნიშნავს. ილია მეორემ ეს "დღესასწაული" მას შემდეგ დააწესა, რაც 2013 წლის 17 მაისს მრევლმა და სასულიერო პირებმა მშვიდობიანი მოქალაქეები ძალადობრივად დაარბიეს.