ჯანდაცვის მინისტრმა ეკატერინე ტიკარაძემ განაცხადა, რომ თუკი ბოლნისის მუნიციპალიტეტში 10 და მეტი ინფიცირების შემთხვევას ისევ გამოავლენენ, რეგიონში ღონისძიებებს გაამკაცრებენ. საზოგადოებრივ მაუწყებელთან ინტერვიუსას მინისტრი ამით ბოლნისში გამოვლენილ კორონავირუსის 15 ახალ შემთხვევას გამოეხმაურა;

"ბოლნისის მუნიციპალიტეტი დარჩება საყურადღებო და არის მოლოდინი, რომ თუ შემდეგ დღეებში 10 და მეტი პაციენტი, ჩვენ ამ რეგიონში ღონისძიებებს გავამკაცრებთ. [...] 15 ახალი დაინფიცირებული, რა თქმა უნდა, ქვეყნის მასშტაბით დიდ გავლენას არ მოახდენს, თუმცა რა თქმა უნდა ჩვენ კვლავ დავინახეთ, რომ ეს რეგიონი არის ძალიან საყურადღებო და შესაბამისად, ჩვენი აქტიური მუშაობა გრძელდება და ეპიდემიოლოგები და ჯანდაცვის სფეროს წარმომადგენლები ამ დღეების მანძილზეც, კვლავ ინტენსიურად გააგრძელებენ იმ საველე სამუშაოებს, რის შედეგადაც ჩვენ ვიკვლევთ ამ რეგიონში მოსახლეობას და შესაბამისად, რა თქმა უნდა, გვყავს ის გამოვლენილი კოვიდ ინფიცირებულები, რომლებიც აღმოჩენილები არიან ამ რეგიონში და რომლებიც არიან ძალიან საყურადღებოები არიან ეპიდსიტუაციის გავრცელებასთან მიმართებაში", — თქვა მინისტრმა.

14 მაისს საღამოს ცნობილი გახდა, რომ ბოლნისის ორ სოფელში კორონავირუსის 15 ახალი შემთხვევა დადასტურდა. ბოლნისის მერის, დავით შერაზადიშვილის ცნობით, სოფელ მუშევანსა და სოფელ გეტაში სულ 131 ნიმუში გუშინ, 13 მაისს აიღეს, მათგან 8 გეტაში, 7 კი მუშევანში დადასტურდა. საქართველოში კორონავირუსის დადასტურებული შემთხვევების რიცხვი 667-მდე გაიზარდა. ინფიცირებულებს შორის გამოჯანმრთელებულია 383 ადამიანი, ხოლო გარდაცვლილია 12 პაციენტი.