საპარლამენტო ფრაქცია დამოუკიდებელი დეპუტატების წევრი, მარიამ ჯაში ამბობს, რომ თუ ქართული ოცნება პოლიტიკურ ლიდერებს და 20 ივნისთან დაკავშირებულ პატიმრებს გაათავისუფლებს, ის საარჩევნო ხმებს აუცილებლად დაკარგავს. ამის შესახებ მან მედიაცენტრ მთავარის პრესკლუბში ისაუბრა.

ასევე, მისი თქმით, თუ შეთანხმება ბოლომდე არ იქნება შესრულებული, გაგრძელდება კრიტიკა ჩვენი სტრატეგიული პარტნიორების მხრიდან და მათი მხარდაჭერის დაკარგვის შემთხვევაში საქართველო ოკუპანტ ქვეყანასთან პირისპირ აღმოჩნდება.

როგორც ჯაში ამბობს, ამ დაკავებულ პოლიტიკურ ლიდერებთან დაკავშირებით გამოსავალი იქნება, თუ ევროსაბჭოს საპარლამენტო ასამბლეას მიმართავენ და ამ საქმეებს მათ მიერ გამოყოფილი დამოუკიდებელი ექსპერტები შეისწავლიან.

"8 მარტის შეთანხმებამ რეალურად ჩიხში შეიყვანა ხელისუფლება. რადგან მისი ნებისმიერი გადაწყვეტილება და ნაბიჯი აუცილებლად გახდება კრიტიკის საკითხი. თუ ქართული ოცნება გაათავისუფლებს პოლიტიკურ ლიდერებს და 20 ივნისთან დაკავშირებით პატიმარს, ის აუცილებლად დაკარგავს საარჩევნო ხმებს. მეორე მხრივ, თუკი შეთანხმება ბოლომდე არ იქნება შესრულებული, გაგრძელდება კრიტიკა ჩვენი სტრატეგიული პარტნიორების მხრიდან. ჩვენ თუ დავკარგავთ ევროკავშირის ან ვაშინგტონის მხარდაჭერას, აუცილებლად აღმოვჩნდებით პირისპირ ოკუპანტ სახელმწიფოსთან, რაც ნიშნავს საქართველოს ტერიტორიების სამუდამოდ დაკარგვას და ქვეყანაში თავისუფლებისა და დემოკრატიული ნაბიჯების სტაგნაციას და უკუსვლას", — განაცხადა მარიამ ჯაშმა.