ფრაქცია ქართული ოცნება – მრეწველების თავმჯდომარე, სიმონ ნოზაძე ამბობს, რომ საქართველო დამოუკიდებელი სახელმწიფოა და მის საშინაო და საგარეო კურსს თავად განსაზღვრავს. ამის შესახებ მან მედიაცენტრ მთავარის პრესკლუბში განაცხადა.

მისი თქმით, 8 მარტის შეთანხმებაში პოლიტიკურ პატიმრებზე საუბარი არ ყოფილა და შეთანხმების ფასილიტატორი ელჩები, ამას არ ამბობენ.

"როგორი სათქმელია ახლა რომელიმე ელჩის მიერ, რომ მიუთითოს პარლამენტს, რომ შენ მართლმსაჯულებაზე მოახდინე ზემოქმედება და გამოაშვებინე ესა და ეს პიროვნება. ისინი თავიანთ ქვეყნებში ამას გააკეთებენ? მათი ქვეყნის პარლამენტები, კონგრესები, სეიმები ამას, რა თქმა უნდა, არ გააკეთებენ. მივეჩვიოთ, რომ საქართველო დამოუკიდებელი ქვეყანა არის, მის საგარეო პოლიტიკურ კურსსაც ის განსაზღვრავს, საშინაო პოლიტიკურ კურსსაც ის დამოუკიდებლად განსაზღვრავს, მაგრამ განსაზღვრავს მეგობრებთან ერთად და მეგობრების მხარდაჭერის იმედით. და არა ის, რომ მის საშინაო საქმეებში ვინმე ჩაერიოს", — განაცხადა ნოზაძემ.

ნოზაძე ასევე გამოეხმაურა ევროპარლამენტარ, ანდრიუსს კუბილიუსის განცხადებას, რომ ევროკავშირისგან ფულადი დახმარების მიღება 8 მარტის შეთანხმების შესრულებასთანაა დაკავშირებული. ნოზაძის თქმით, ეს დახმარება აუცილებლად იქნება.