მართალია, ცნობილი სიტკომი The Office შვიდი წლის წინ, 2013 წელს დასრულდა, მაგრამ ამ შოუს მსახიობები დღემდე აგრძელებენ ერთგული მაყურებლების სიუპრიზებით განებივრებას.

ამჯერად ჯონ კრასინსკიმ და სტივ კარელმა გადაწყვიტეს, რომ ახალდაქორწინებული წყვილისთვის, სუზანისა და ჯონისთვის ქორწილი ვირტუალურად გადაეხადათ. დაგვეთანხმებით, რომ ოფისის მსახიობებზე უკეთესი სტუმრები ნამდვილ ფანებს ქორწილში ვერ ეყოლებოდათ.

ცერემონიამ ყველა წესის დაცვით ჩიარა: წყვილმა სპეციალური სიტყვა წარმოთქვა, მუსიკოსმა ზაკ ბრაუნმა იმღერა და ამ ყველაფერს Zoom-ის საშუალებით წყვილის ოჯახის წევრებიც "ესწრებოდნენ".

რაც ყველაზე მთავარია, ცერემონიას ოფისის სხვა ცნობილი სახეებიც შემოუერთდნენ: მინდი კალინგი, რეინ უილსონი, ანჯელა კინსი, ედ ჰელმსი, ფილის სმიტი და სხვები.

ამ ყველაფრის ემოციური დასასრულისთვის კი მსახიობებმა სიტკომის ცნობილი სცენის შთაგონებით, როცა ჯიმი და პემი ქორწინდებიან, კრის ბრაუნის სიმღერაზე Forever იცეკვეს.

აღსანიშნავია, რომ იზოლაციაში ეს ოფისის მსახიობების გაერთიანების პირველი შემთხვევა არ არის: მარტში სტივ კალერმა და ჯონ კრასინსკიმ ამ უკანასკნელის იუთუბარხზე Some Good News სწორედ სერიალის გამოსვლიდან 15 წლის აღსანიშნავად ერთად თანამშრომლობის დრო გაიხსენეს.