ეკონომიკის მინისტრის, ნათია თურნავას განცხადებით, სექტემბერში საქართველოში მსოფლო ტურიზმის ორგანიზაციის ეგიდით მინისტერიალი ჩატარდება, რომელშიც რამდენიმე ათეული ქვეყნის მინისტრი მიიღებს მონაწილეობას. მისი თქმით, მინისტერიალზე გადაწყდება, თუ როგორ განვითარდება ტურიზმის ინდუსტრია მსოფლიოში.

თურნავას მტკიცებით, მინისტერიალი საქართველოში იმიტომ ტარდება, რომ ვართ პირველი ქვეყანა, ვინც ყველაზე ადრე იქნება მზად ტურისტების მისაღებად.

"ჩვენ პირველი ივლისიდან მზად ვართ, მივიღოთ საერთაშორისო ვიზიტორები და გვაქვს ძალიან კონკრეტული გეგმა, როგორ გავხადოთ ეს ტურისტული სეზონის გახსნა არა მარტო ჩვენთვის მნიშვნელოვანი და სასიამოვნო ჩვენი სტუმრებისთვის, არამედ, სრულიად უსაფრთხო, როგორც საკუთარი მოსახლეობისთვის, ასევე ჩამოსული ტურისტებისთვის", — განაცხადა მან.

მთავრობის შემუშავებული ტურიზმის ანტიკრიზისული გეგმით, 15 ივნისიდან შიდა ტურიზმი უნდა ამუშავდეს, პირველი ივლისიდან კი ქვეყანა მზად უნდა იყოს საერთაშორისო ტურისტების მისაღებად.