პრემიერ-მინისტრის, გიორგი გახარიას განცხადებით, ტურიზმის ასამუშავებლად საელჩოები უკვე აწარმოებენ მოლაპარაკებებს სხვადასხვა სახელმწიფოებთან და უსაფრთხო დერეფნებზე ინტერესი გამოთქვა ისრაელმა და ავსტრიამ. მისივე თქმით, მეზობელ ქვეყნებს უკვე დიდი ხანია აქვთ იმავეს ინტერესი.

მთავრობის პრესამსახურის ინფორმაციით, გახარიამ ასევე აღნიშნა, რომ ელოდებიან გაეროს ინსტრუქციებს, თუ რას გამოაცხადებენ საერთაშორისო დონეზე ტურისტულად უსაფრთხო ზონებად და რა ინსტრუმენტები და წესები იქნება დასაცავი.

"გვინდა, ამ მიმართულებით ვითანამშრომლოთ. ჩვენთვის ეს ყველაფერი არის შესაძლებლობა, ტურიზმი, როგორც ეკონომიკის დარგი ნელ-ნელა გავხსნათ, ჯერ შიდა, შემდეგ — საერთაშორისო დონეზე; შეძლებისდაგვარად, იმ ხარისხიდან გამომდინარე, რა ხარისხითაც შევასრულებთ თქვენს და ჩვენს შიდა მოთხოვნებს, შევუერთდეთ ევროპის ტურისტულ ბაზარს და ამაში გვჭირდება თქვენთან თანამშრომლობა და ურთიერთდახმარება", — განაცხადა მან გაეროს მსოფლიო ტურიზმის ორგანიზაციის გენერალურ მდივანთან საუბრისას.

მთავრობის შემუშავებული ტურიზმის ანტიკრიზისული გეგმით, 15 ივნისიდან შიდა ტურიზმი უნდა ამუშავდეს, პირველი ივლისიდან კი ქვეყანა მზად უნდა იყოს საერთაშორისო ტურისტების მისაღებად.