დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელის, ხათუნა ზახაშვილის განცხადებით, საზოგადოებრივი ტრანსპორტის აღდგენის შემდეგ მგზავრებისთვის პირბადის გამოყენება რეკომენდირებული უნდა დარჩეს.

მისი თქმით, დღეისთვის აღიარებულია, რომ თუ დაავადებული ადამიანი გამოიყენებს ნიღაბს, ის დაახლოებით, 50-70%-მდე შეამცირებს რისკს, რომ ჯანმრთელ ადამიანს თავისი დაავადება გადასდოს. ხოლო თუ ჯანმრთელი ადამიანი გამოიყენებს ნიღაბს, ის გარკვეულწილად შეიმცირებს რისკს, რომ მის ლორწოვან გარსებზე ცხვირსა და პირზე ვირუსი მოხვდეს.

"რეკომენდებულია დღესდღეობით, რომ ყველამ დახურულ სივრცეში გამოიყენოს ნიღაბი განსაკუთრებით ახლო ურთიერთობების დროს, ეს გულისხმობს 1 მეტრზე ახლო ურთიერთობას, საუბარს. ჩვენ ვფიქრობთ, რომ თუ დაავადების გავრცელება შენარჩუნდა მომდევნო პერიოდზე მაშინაც კი, თუ საზოგადოებრივი ტრანსპორტის მოძრაობა აღდგება, რეკომენდებული უნდა დარჩეს მგზავრების მიერ სატრანსპორტო სივრცეში ნიღბის გამოყენება, რაც შეამცირებს დაავადების გავრცელების რისკს", — განაცხადა ზახაშვილმა.