კახეთში, ყვარლის სასწრაფოს ექიმს, რომელსაც სამი დღის წინ, სწრაფი ტესტით კორონავირუსი დაუდგინდა, პირველადი PCR-ით ინფიცირებული არ აღმოჩნდა. ეს ინფორმაცია ჯანდაცვის მინისტრის მოადგილემ, თამარ გაბუნიამ დაადასტურა. TV პირველთან საუბარში იგი ამბობს, რომ ჯერჯერობით უცნობია საბოლოო, მეორეული ტესტის შედეგი:

"რამდენადაც ჩემთვის ცნობილია, არ დაუდასტურდა კორონავირუსი, თუმცა ველოდებოდით დამატებით კვლევას, ბოლო პასუხი ჩემთვის ცნობილი არაა. შეიძლება ეს იყოს ტესტის ხარვეზი, ეს გარკვეულწილად ხდება. არაა გამორიცხული, რომ ცრუ დადებითი PCR-ის დროსაც იყოს".

ყვარლის სასწრაფოს ექიმი ახლა თბილისში, ბოჭორიშვილის კლინიკაშია. კლინიკის სამეთვალყურეო საბჭოს თავმჯდომარე, მაკა სოლოღაშვილი On.ge-სთან ამბობს, რომ ამ საკითხზე "ჯერ ვერაფერს ადასტურებენ", პაციენტი არც ინფიცირებულად ითვლება და ელოდებიან პასუხს ლუგარის ლაბორატორიიდან. მისი თქმით, ტესტის შედეგი გვიან ღამით გახდება ცნობილი.

კახეთის რწმუნებულმა ამ საკითხზე 5 მაისის ბრიფინგისას თქვა, რომ ყვარლის ექიმის ყველა კონტაქტის პასუხი კორონავირუსზე უარყოფითია, თავად ექიმზე კი მიმდინარეობს "ჩაღრმავებული კვლევა" იმის დასადგენად, თუ რა რეალური კლინიკური მდგომარეობა აქვს.

კახეთში კორონავირუსით სასწრაფოს ექიმის ინფიცირებაზე ინფორმაცია 2 მაისს გავრცელდა. მაშინ კახეთის რწმუნებულმა განაცხადა, რომ დაიწყეს კონტაქტების მოძიება და ყველა ასეთ პირს ყვარელში, საკარანტინე ზონაში გადაიყვანენ.