ხელნაწერთა ეროვნული ცენტრის დირექტორი, ზაზა აბაშიძე მოითხოვს, რომ ბოდიში მოუხადონ მათ, ვინც მისი სიტყვები "ეთნიკური შუღლის გაღვივების მცდელობად წარმოაჩინა". თავის ფეისბუქპოსტში აბაშიძემ მხოლოდ უცენზურო სიტყვებისთვის მოიხადა ბოდიში და ამტკიცებს, რომ მის მიმართ წამოსული ბრალდებები ცილისწამებაა.

"არც ერთი შეურაცხმყოფელი სიტყვა, არც ერთ ერზე ჩემს მეგობრებთან მიმოწერაში არ არის! პირიქით, აღნიშნულია, რომ ეს ეხება ყველას — აზერბაიჯანელს, ქართველს, რუსს — საქართველოს ყველა მოქალაქეს! ყველას, ვინც შეგნებულად თუ შეუგნებლად არღვევს საგანგებო რეჟიმს და, ამით საფრთხეს უქმნის სხვას, იქცევა ვირუსის გამავრცელებლად და პრაქტიკულად მკვლელად! ზუსტად იმავეს დავწერდი, მსგავსი ფაქტი რომ მომხდარიყო საქართველოს ნებისმიერ კუთხესა თუ სოფელში", — ამბობს ზაზა აბაშიძე.

რამდენიმე დღის წინ ზაზა აბაშიძემ ფეისბუქის ერთ-ერთი პოსტის კომენტარში დაწერა რომ მარნეულის სოფლის მაცხოვრებლები უნდა "ჩაკეტონ და ამოხოცონ", რასაც თან ერთვოდა რუსულ ენაზე გინება. კიდევ ერთ კომენტარში ზაზა აბაშიძემ მარნეულელებს ვირუსის პოტენციური გამავრცელებლები, მკვლელები უწოდა, აგინა მათ და გაიმეორა, რომ ისინი უნდა გამოკეტონ.

პლატფორმა არა ფობიას! შეფასებით, აღნიშნული კომენტარი ეთნიკური სიძულვილის შემცველი იყო. პლატფორმის განცხადებით, ზაზა აბაშიძის პოზიცია აღვივებს ეთნიკურ შუღლს და გამოხატავს არაჰუმანურ დამოკიდებულებას ეთნიკურად აზერბაიჯანელების მიმართ.

ევროპულმა საქართველომ კი ზაზა აბაშიძის თანამდებობიდან მოხსნა და მის მიმართ კანონმდებლობით გათვალისწინებული ზომების მიღება მოითხოვა.

ზაზა აბაშიძე ხელმძღვანელობს ხელნაწერთა ეროვნულ ცენტრს, რომელიც, სახელმწიფო ბიუჯეტიდან, ანუ მოქალაქეთა გადასახადებით ფინანსდება, ხოლო ამ პოზიციამდე იგი რუსულ-ქართული საზოგადოებრივი ცენტრის თავმჯდომარე იყო. ცენტრი დააფუძნა ა.მ. გორჩაკოვის სახელობის საჯარო დიპლომატიის მხარდაჭერის ფონდმა, რომლის თავმჯდომარეა რუსეთის საგარეო საქმეთა მინისტრი სერგეი ლავროვი.