დაავადებათა კონტროლის ცენტრის ხელმძღვანელის, ამირან გამყრელიძის ინფორმაციით, საქართველოში სამედიცინო პერსონალის კორონავირუსით დაინფიცირების 72 შემთხვევაა დადასტურებული.

მისი თქმით, დაინფიცირების ყველაზე მეტი პროცენტი იქაა, სადაც კონტაქტია არა უკვე დადგენილ, არამედ უფრო შესაძლო შემთხვევებთანაა. ამიტომ, მისი განმარტებით, დამცავი საშუალებებისა და ინფექციის კონტროლის ღონისძიებების კიდევ უფრო გამკაცრება არა მარტო იმ დაწესებულებებშია საჭირო, სადაც კორონავირუსით დადასტურებული ავადმყოფები მკურნალობენ, არამედ იქაც, სადაც შესაძლო შემთხვევა შეიძლება მოხვდეს.

"დილის მონაცემებით, საქართველოში სამედიცინო პერსონალის კორონავირუსით დაინფიცირების 72 შემთხვევა გვაქვს, რაც დაახლოებით 12,7%-ს შეადგენს. ეს არც ცოტაა და არც ძალიან ბევრი, დაახლოებით, საშუალო მაჩვენებელზე ვართ საერთაშორისო მაჩვენებლის მიხედვით. დაინფიცირების ყველაზე მეტი პროცენტი მოდის იქ, სადაც კონტაქტია ხოლმე არა უკვე დადგენილ, არამედ უფრო შესაძლო შემთხვევებთან. მაგალითად, სასწრაფოების შემთხვევაში, დაახლოებით 30-მდე სასწრაფოს თანამშრომელია დაინფცირებული", — განაცხადა გამყრელიძემ იმედის ეთერში.