საქართველოს პრეზიდენტმა დღეს საქართველოს ახალარჩეულ პარლამენტს პირველ სხდომაზე მიმართა და შესთავაზა მას გააძლიეროს მედიის დაცვის მექანიზმები და შექმნას დაცვის უფრო მყარი გარანტიები.

"როდესაც ვსაუბრობთ ქვეყნის დემოკრატიაზე, არ შეიძლება არ ვახსენოთ თავისუფალი და პლურალისტული მედიის არსებობის აუცილებლობა. არავის არც ქვეყნის შიგნით, არც მის ფარგლებს გარეთ არ უნდა დარჩეს კითხები მედიის თავისუფლებასთან დაკავშირებით.

არ უნდა გვქონდეს გაუგებარი მიზეზებით დახურული რეიტინგული ტოქ-შოუები. ფარული თვალთვალი, ფარული თვალთვალი, შანტაჟი და მუქარა მედიის წარმომადგენლებზე. არ უნდა გვყავდეს სამსახურიდან გათავისუფლებული ჟურნალისტები".

პრეზიდენტის თქმით, მნიშვნელოვანია მედიის მუშაობის პროცესში პოლიტიკური ზეგავლენის ეჭვი არ არსებობდეს:

"მე ყოველთვის მხარს ვუჭერდი და მომავალშიც აქტიურად გავაგრძელებ მედიის უფლებების დაცვასა და მხარდაჭერას, რადგან მიმაჩნია, რომ მედია, როგორც მეოთხე ხელისუფლება უნდა იყოს აქტიური და თავისუფალი".

პრეზიდენტის თქმით, მნიშვნელოვანია შეიქმნას მედიის დაცვის მექანიზმები და მას ჰქონდეს უსაფრთხოების გარანტიები.