ოკუპირებულ აფხაზეთში კორონავირუსით ქალი გარდაიცვალა. დე ფაქტო ხელისუფლების ინფორმაციით, ის 95 წლის იყო და თანმდევი ქრონიკული დაავადებები ჰქონდა.

მათი მტკიცებით, ქალს ვირუსი 11 აპრილს დაუდასტურდა, თუმცა 20 აპრილამდე ჰოსპიტალიზაციაზე უარს აცხადებდა. მათივე თქმით, ჰოსპიტალიზაციისას პაციენტს უკვე ორმხრივი პნევმონია ჰქონდა განვითარებული.

შერიგებისა და სამოქალაქო თანასწორობის საკითხებში სახელმწიფო მინისტრის აპარატში On.ge-ს განუცხადეს, რომ არსებული ინფორმაციით, გარდაცვლილი ქალი რუსეთიდან შემოსული ინფიცირებულის ერთ-ერთი კონტაქტია.

"ჩვენ ვცდილობთ ყველა შესაძლელობით დავეხმაროთ აფხაზეთში ჩვენს მოსახლეობას პანდემიასთან გამკლავებაში. თანაგრძნობას ვუცხადებთ ამ ქალბატონის ოჯახს და ყველა მსხვერპლის ოჯახს ჩვენს ქვეყანაში", — აცხადებენ მინისტრის აპარატში.

ოკუპირებული აფხაზეთის დე ფაქტო ხელისუფლება ისევ უარზეა, კორონავირუსთან საბრძოლველად ოფიციალური თბილისისგან დახმარება მიიღოს. მაშინ, როცა ადგილობრივი ექიმები ამბობენ, რომ რეგიონში ვირუსის აფეთქების შემთხვევაში პაციენტების სამართავად, არც აღჭურვილობა და არც ადამიანური რესურსი ეყოფათ, დე ფაქტო მმართველები ფიქრობენ, რომ ჯერ "სიამაყისთვის გადაბიჯება" ადრეა.

"რა თქმა უნდა, საქართველოს ხელისუფლება იმეორებს თავის მედიებში, რომ მზადაა დაგვეხმაროს. ბოდიში, მაგრამ ჩვენ სანაპიროების დაკარგვა არ შეგვიძლია, მიუხედავად იმისა, რომ ეპიდემიაა. თანაც არანაირი აფეთქება ახლა არ არის, რომ სიამაყეს გადავაბიჯოთ და თბილისს რამე ვთხოვოთ", — განაცხადა BBC-სთან საუბრისას აფხაზეთში კორონავირუსთან ბრძოლის დე ფაქტო შტაბის წარმომადგენელმა, ალხას ჯიჯოლიამ.

საოკუპაციო რეჟიმი ამტკიცებს, რომ აფხაზეთში ინფიცირების მხოლოდ 3 შემთხვევაა დადასტურებული და მათ მოახერხეს ინფიცირებულთა კონტაქტების იზოლირება, რითიც ვირუსის გავრცელება ამ ეტაპზე აღმოფხვრეს. ამ მონაცემების ქართულ მხარეს არ სჯერა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: