საქართველოს ყოფილი პრეზიდენტისა და ოდესის ყოფილი გუბერნატორის, მიხეილ სააკაშვილის თქმით, რადაში მის კანდიდატურას 30 აპრილს უყრიან კენჭს. ამის შესახებ მან ფეისბუქზე დაწერა.

"რა თქმა უნდა, იყო იმედები, რომ ვიცე-პრემიერის თანამდებობაზე ჩემს კანდიდატურას დღეს უყრიდნენ კენჭს, მაგრამ მე დარწმუნებული ვარ პრეზიდენტი ზელენსკის, ხალხის მსახურის ფრაქციის დეპუტატებისა და სხვა ფრაქციების მხარდაჭერაში, ამიტომაც ხუთშაბათის კენჭისყრისთვის მოვემზადებით", — წერს სააკაშვილი.

22 აპრილს ცნობილი გახდა, რომ მიხეილ სააკაშვილი უკრაინის ვიცე-პრემიერის პოსტზე განიხილებოდა. როგორც სააკაშვილმა განაცხადა, თანამდებობა მას პრეზიდენტმა ვოლოდიმირ ზელენსკიმ შესთავაზა.

დღეს მიხეილ სააკაშვილი მმართველი პარტიის ხალხის მსახურის ფრაქციის დეპუტატებს შეხვდა და საკუთარი გეგმა გააცნო. მისივე თქმით, შეხვედრამ კონსტრუქციულად ჩაიარა.

"პრეზიდენტმა საერთაშორისო სავალუტო ფონდთან მოლაპარაკებები დამავალა. უკრაინას გაცილებით დიდი დახმარება სჭირდება, ვიდრე იღებს", — აღნიშნა სააკაშვილმა შეხვედრის დაწყების წინ.

უკრაინის მთავრობაში სააკაშვილის დანიშვნას გამოეხმაურნენ საქართველოს ხელისუფლების წევრებიც. პრემიერმინისტრის, გიორგი გახარიას თქმით, პარტნიორი ქვეყნის მიერ ძებნილი ადამიანის ვიცე-პრემიერად დანიშვნა, კატეგორიულად მიუღებელია. როგორც პრემიერმა თქვა, თუ მსგავსი გადაწყვეტილება მიღებული იქნება ელჩს კონსულტაციებისთვის გაიწვევენ.