საქართველოს ახალგაზრდა იურისტთა ასოციაციის განცხადებით, თბილისის ერთ-ერთ საკარანტინო ზონაში 2 პირი 8 დღის განმავლობაში პროტესტის ნიშნად შიმშილობდა. როგორც ორგანიზაცია აცხადებს, ისინი რამდენიმე დღეა შესაბამის ორგანოებთან დაკავშირებასა და პასუხების მიღებას ცდილობენ.

საიას ინფორმაციით, შოთა და ირაკლი გურეშიძეემი საქართველოში 14 აპრილს ჩამოფრინდნენ, ისინი მაშინვე გადაიყვანეს საკარანტინო ზონაში. როგორც ორგანიზაცია განმარტავს, მათ თვითზიზოლაციისთვის სათანადო საცხოვრებელი ჰქონდათ, თუმცა გადასვლაზე უარი დაუსაბუთებლად უთხრეს, რის გამოც კარანტინში დარჩენაზე უარი განაცხადეს.

"ხელის მოწერაზე უარის თქმა პოლიციის თანამშრომლებმა მიიჩნიეს ადმინისტრაციულ სამართალდარღვევად, ორივე მათგანს შეუდგინეს ადმინისტრაციული სამართალდარღვევის ოქმები და დააჯარიმეს 3000-3000 ლარით. მომხდარის გამო, ირაკლი და შოთა გურეშიძეებმა შიმშილობა დაიწყეს, რომლის შეწყვეტაც 8 დღის შემდგომ, ჯანმრთელობის გაუარესების გამო მოუწიათ", — ამბობენ საიაში.

ორგანიზაციის განმარტებით, იმის გამო, რომ გურეშიძეები საკარანტინო ზონაში ყოფნას არ ეთანხმებოდნენ, მათ ადმინისტრაციული საჩივრით შესაბამის უწყებებს მიმართეს:

"იმის გათვალისწინებით, რომ მათ არ აქვთ საკარანტინო ზონის დატოვების უფლება, საჩივარი გაგზავნეს საქართველოს შინაგან საქმეთა სამინისტროსა და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს ოფიციალურ მეილზე, ასევე Facebook-ის ოფიციალურ გვერდებზე. თუმცა, მათთვის დღემდე უცნობია, რა რეაგირება მოჰყვა წარდგენილ საჩივრებს. ისინი ვერც ოფიციალურ ცხელ ხაზზე ახერხებენ დაკავშირებას და სათანადო დასაბუთების მიღებას".

საია მოუწოდებს საქართველოს შინაგან საქმეთა სამინისტროსა და ჯანდაცვის სამინისტროს 14-დღიანი საკარანტინო ვადის ამოწურვამდე განიხილონ საჩივარი.