ჯანდაცვის მინისტრმა, ეკატერინე ტიკარაძემ მთავრობის ადმინისტრაციაში გამართულ ბრიფინგზე განმარტა, რომ საქართველოში კორონავირუსით ინფიცირებულებს პრეპარატ პლაქვენილით მხოლოდ უკიდურეს შემთხვევაში მკურნალობენ. მანვე თქვა, რომ ამ მხრივ მკურნალობის ქართულ პროტოკოლში ცვლილება არ შესულა:

"ის გამოხმაურება, რომელიც არაერთხელ იყო მედიასაშუალებებში, რომ ექიმები ამ წამალს მსუბუქ შემთხვევებზეც იყენებენ, ეს არაა სიმართლე. ისინი იყენებენ მას უკიდურეს შემთხვევებში, საჭიროებისამებრ. ჩვენ სრულიად ვიზიარებთ საერთაშორისო საზოგადოების გამოცდილებას და ასევე კარგად ვიცნობთ გვერდით მოვლენებს".

რამდენიმე დღის წინ ამერიკაში მცხოვრებმა ქართველმა ექიმმა, ზურაბ გურულმა ფეისბუქზე კორონავირუსის მკურნალობის ქართული პროტოკოლი გააკრიტიკა. მან ასევე განაცხადა, რომ სწორედ ამ პროტოკოლის მიხედვით, პრეპარატ პლაქვენილით საქართველოში უსიმპტომო და მსუბუქ პაციენტებს მკურნალობენ, რაც დაუშვებელი და სახიფათოა.

ქართული პროტოკოლის თანაავტორმა და კორონავირუსის კლინიკური კონტროლის ჯგუფის ხელმძღვანელმა, თენგიზ ცერცვაძემ კი ზურაბ გურული "ფაქტობრივი ტყუილის გავრცელებაში" დაადანაშაულა და თქვა, რომ ქართული პროტოკოლით პრეპარატი მხოლოდ მძიმე ან განსაკუთრებით მძიმე პაციენტებს ენიშნებათ.

ამ ამბებს დაემატა რადიო თავისუფლების მიერ მომზადებული ინტერვიუ ერთ-ერთ ინფიცირებულ პაციენტთან, რომელიც ამბობს, რომ მსუბუქი სიმპტომების მიუხედავად, პლაქვენილი დაუნიშნეს.

ამ თემაზე დეტალურად წაიკითხეთ: