შვედეთის პრინცესა სოფია სტოკჰოლმის საავადმყოფოში იმ სამედიცინო პერსონალს დაეხმარება, რომლებიც კორონავირუსით დაავადებულებს მკურნალობენ. ინფორმაციას შვედეთის სამეფო სახლი ავრცელებს.

პრინცესა სოფია ყოფილი მოდელია. მან გადაუდებელი სამედიცინო დახმარების 3-დღიანი კურსი გაიარა და სწორედ ამის შემდეგ მიეცა საშუალება, საავადმყოფოში მოხალისედ ჩართულიყო.

მისი საქმე კორონავირუსის პაციენტებთან უშუალო კონტაქტი არ იქნება, თუმცა ის დაეხმარება იმ პროფესიონალებს, რომლებიც ინფიცირებულებს მკურნალობენ. მოხალისეების მოვალეობებში შედის დეზინფექციის ჩატარება, დასუფთავება და სამზარეულოში მუშაობაც.

"კრიზისის პირობებში პრინცესას სურს ჩაერთოს ამ პროცესში და ჯანდაცვის სფეროს პროფესიონალებს დიდი დატვირთვა შეუმსუბუქოს", — აცხადებს სამეფო ოჯახი.

შვედეთი პანდემიურ სიტუაციას ევროპის სხვა ქვეყნებისგან განსხვავებულად უმკლავდება. კორონავირუსზე შვედეთის აკრძალვები მინიმალურია, საზოგადოებრივი პასუხისმგებლობა კი — მაღალი.

მთავარი არხის გადაცემაში შენი დილა დღეს ქართველმა ემიგრანტმა იმ მიდგომებზე ისაუბრა, რომელიც ქვეყანას პანდემიასთან ბრძოლაში გამოარჩევს.