სოფო ბედია იმ ადამიანების რეაქციებს აკრიტიკებს, რომლებსაც გუშინ გამოქვეყნებული კლიპი არ მოეწონათ. ბედიას თქმით, სიმღერა "გამამხნევებელი, კეთილი და თბილი მესიჯი" იყო საზოგადოებისთვის. ის ასევე ამბობს, რომ კლიპი პოლიტიკური არაა.

"სრულიად უკაპიკოდ, უანგაროდ გაკეთებული სიმღერა და კლიპია! რასაც ვუყურებ და ვისმენ, მოგიწოდებთ ყველას თუ კლიპის ხარისხი და თავად კლიპი არ მოგწონთ, რომელიც ნაჩქარევად დაამონტაჟა ბესო კვარაცხელიამ, სრულიად უსასყიდლოდ და მოქალაქეობრივი პასუხისმგებლობით! გამოჩნდით და შემეხმიანეთ ის კლიპმეიკერები, ვინც უსასყიდლოდ და უკაპიკოდ გადაიღებთ უკეთესს და ხარისხიანს!" — წერს ის ფეისბუქზე.

ბედიას სიტყვებით, მისი "კეთილი მიზანი ბოროტად გამოიყენეს და პოლიტიკური სარჩული დაუდეს".

კლიპში ძველი ქართული სახეები თვითიზოლირებულ მოსახლეობას სახლში დარჩენაზე უმღერიან. ვიდეოს პრემიერა გუშინ, ტელეკომპანია იმედის ეთერში შედგა. ამ დროისთვის კლიპს YouTube-ზე 202,5 ათასი ნახვა, 987 მოწონება და 5000-ზე მეტი უარყოფითი შეფასება აქვს.