მომღერალი პინკი აცხადებს, რომ ორი კვირის წინ კორონავირუსი დაუდგინდა, თუმცა ახლა თავს კარგად გრძნობს.

"ორი კვირის წინ მე და ჩემს სამი წლის შვილს, ჯემისონს COVID-19-ის სიმპტომები გვქონდა. საბედნიეროდ, ჩვენი ოჯახის ექიმს ტესტებზე ხელი მიუწვდებოდა და დავადგინეთ, რომ კორონავირუსი გვქონდა", — დაწერა პინკმა.

40 წლის ვარსკვლავი თვითიზოლაციაში რჩება.

პინკმა აშშ-ის ჯანდაცვის სისტემაზეც ისაუბრა და მთავრობა გააკრიტიკა იმის გამო, რომ ტესტები ყველასთვის ხელმისაწვდომი არაა: "ეს დაავადება რეალური და სერიოზულია. ის ყველას ემართება, ახალგაზრდებს და მოხუცებს, მდიდრებსა და ღარიბებს. ფართო ტესტირება აუცილებელია, რათა დავიცვათ ჩვენი შვილები, ოჯახები, მეგობრები და მეზობლები".

პინკმა პირობა დადო, რომ $500 000-ს ჯანდაცვის სფეროს მუშაკების მხარდასაჭერად გადარიცხავს, $500 000-ს კი – დაავადებასთან ბრძოლის ფონდში.