სახალხო დამცველი მოუწოდებს საქართველოს მთავრობას უახლოეს მომავალში განახორციელოს სტამბულის კონვენციის რატიფიცირება და მიიღოს ყველა ზომა "ახლად აღმოჩენილი მავნე პრაქტიკის" აღმოსაფხვრელად.

სახალხო დამცველის განცხადებით, ომბუდსმენის რწმუნებულებთან შეხვედრისას, ყვარლის მუნიციპალიტეტის რამდენიმე სოფელში, ადგილობრივი მოსახლეობის ნაწილმა დაადასტურა გოგოების წინდაცვეთის პრაქტიკის არსებობა, რომელსაც "ნათლობას" უწოდებენ. ამის შესახებ სახალხო დამცველმა დღეს, 12 ნოემბერს, განცხადება გაავრცელა.

საკითხის შესწავლის შედეგად მოპოვებული ინფორმაცია სახალხო დამცველმა 2016 წლის 11 ნოემბერს, საქართველოს შრომის, ჯანმრთელობისა და სოციალური დაცვის სამინისტროს, საქართველოს შინაგან საქმეთა სამინისტროსა და საქართველოს მთავარ პროკურატურას მიაწოდა.

საქართველომ 2014 წელს ხელი მოაწერა ევროსაბჭოს კონვენციას "ქალთა მიმართ ძალადობისა და ოჯახში ძალადობის წინააღმდეგ ბრძოლასა და პრევენციაზე", სადაც ცალკე მუხლი ეთმობა "ქალის გენიტალების დასახიჩრებას". ომბუდსმენის ინფორმაციით, მისი რატიფიცირება ამ დრომდე არ მომხდარა.

ომბუდსმენი მიიჩნევს, რომ ქალის გენიტალიების დასახიჩრება უფლებადარღვევის უკიდურესი ფორმაა, რომელიც არღვევს ქალის ჯანმრთელობის, უსაფრთხოების, ფიზიკური ხელშეუხებლობისა და წამების აკრძალვის უფლებებს.

აღნიშნული პრაქტიკა საერთაშორისო ორგანიზაცია "ომისა და მშვიდობის გაშუქების ინსტიტუტის" (IWPR) მიერ ჩატარებული ჟურნალისტური გამოძიების შედეგად გამოვლინდა.