რუსეთის პრეზიდენტი ვლადიმერ პუტინი ამბობს, რომ საპრეზიდენტო ვადის დასრულების შემდეგ მისი სტატუსი "მოსახლეობის სურვილზე იქნება დამოკიდებული". ამის შესახებ პუტინმა TASS-თან ინტერვიუს დროს ისაუბრა.

"არ ვიცი, ვნახოთ", — უპასუხა პუტინმა კითხვას, თუ სად ხედავდა ის საკუთარ თავს 2024 წლის შემდეგ.

"წინ ჯერ ოთხი წელია, ახლა არ მაქვს პასუხის", — აღნიშნა რუსეთის პრეზიდენტმა.

ვლადიმერ პუტინი რუსეთის ხელისუფლების სათავეში 2000 წლიდანაა. საპრეზიდენტო ორი ვადის მოხდის შემდეგ, 2008 წელს პუტინი პრემიერ-მინისტრი გახდა, 2012 წელს კი პრეზიდენტობას ისევ დაუბრუნდა.

საპრეზიდენტო ვადის გასვლამდე ოთხი წლით ადრე პუტინმა საკონსტიტუციო ცვლილებების განხორციელება გადაწყვიტა. მიუხედავად იმისა, რომ ინიციატივა უშუალოდ მას არ წამოუყენებია, პუტინი დათანხმდა დუმის დეპუტატის იდეას, რომ საკონსტიტუციო ცვლილებების ფარგლებში მისთვის საპრეზიდენტო ვადები გაენულებინათ. ამის შემდეგ მას საშუალება ეძლევა, რომ რუსეთის პრეზიდენტი 2036 წლამდე დარჩეს.

აღნიშნულ ცვლილებას მხარი დაუჭირა, როგორც რუსეთის პარლამენტის ორმა პალატამ, ისე რეგიონულმა პარლამენტებმა და დასაშვებად სცნო საკონსტიტუციო სასამართლომ.