კომპანია მს ჯგუფის ხელმძღვანელი, შუქრი ბურჭულაძე ამბობს, რომ კორონავირუსთან დაკავშირებით თანამშრომელმა ცრუ მოკლე ტექსტური შეტყობინებები ხუმრობით გაგზავნა. ამ თემაზე მან მთავარ არხთან ისაუბრა.

"როგორც ჩვენ გავარკვიეთ შიდა მოძიებით, ექვს ნომერზე, თავის ახლობელ 5 თავის ადამიანს მთავრობის ბრენდნეიმით გაუგზავნა SMS-ები. გაუგებრობა მოხდა, ჩვენი თანამშრომელი უბრალოდ გაეხუმრა ძაან ცუდად. რა თქმა უნდა. ამისთვის ჩვენ მივიღეთ ზომები, ამიტომ ის თავისივე თანხმობით უნდა გაგვეთავისუფლებინა", — თქვა შუქრი ბურჭულაძემ.

შუქრი ბურჭულაძემ აღნიშნა, რომ გამოძებაში გამოჩნდება მათ წინააღმდეგ სპეცოპერაციის ჩატარების საფუძველი არ არსებობს.

ცოტა ხნის წინ გავრცელდა ინფორმაცია, რომ სახელმწიფო უსაფრთხოების სამსახური ბურჭულაძეების კომპანიის კუთვნილ ოფისში საგამოძიებო მოქმედებებს ატარებს. ბურჭულაძეების ადვოკატმა, მიხეილ რამიშვილმა On.ge-სთან საუბრისას აღნიშნა, სახელმწიფო უსაფრთხოების სამსახურის თანამშრომლები ოფისში კომპიუტერულ ტექნიკას ლუქავენ.

მისივე ინფორმაციით, გამოძიება საქართველოს სისხლის სამართლის კოდექსის 318-ე მუხლით მიმდინარეობს, რაც საბოტაჟს გულისხმობს. ამ თემასთან დაკავშირებით On.ge სახელმწიფო უსაფრთხოების სამსახურს დაუკავშირდა, რომელიც ჯერ კომენტარს არ აკეთებს.