მგზავრებმა ფრენის დროს თვითმფრინავის სალონში შხამიანი გველი აღმოაჩინეს. შემთხვევა მექსიკაში, კომპანია აერომექსიკოს ერთ-ერთ შიდა ავიარეისზე მოხდა. ინფორმაციას ABC ავრცელებს.

მგზავრის, ინდალესიო მედინას თქმით, რომელმაც გველის კადრები ტელეფონით გადაიღო, ის ჟურნალს კითხულობდა, როდესაც გვერდით მჯდომმა გველი დაინახა:

"საშიში სიტუაცია იყო თუმცა, მგზავრებმა სიმშვიდის შენარჩუნება მოახერხეს, რადგან გველი იმ ადგილიდან არ გამოსულა, სადაც ჩამოვარდა და ისტერიკაც არავის არ დაემართა. ზოგი მგზავრი წამოდგა კიდეც, რომ გაეგოთ რა სახის ქვეწარმავალი იყო".

მას შემდეგ, რაც პილოტმა ამბავი გადასცა, თვითმფრინავს მეხიკოში პრიორიტეტული დაშვების უფლება მისცეს. მგზავრებმა თვითმფრინავი დატოვეს, მათი ადგილი კი ცხოველთა კონტროლის სამსახურის თანამშრომლებმა დაიკავეს.

კომპანია აერომექსიკომ განაცხადა, რომ გამოიძიებს, თუ როგორ აღმოჩნდა გველი კაბინაში და მიიღებს შესაბამის ზომებს, რათა მსგავსი ინციდენტი არ განმეორდეს.