დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

p>საქართველოს ჯანდაცვის მინისტრის ინფორმაციით, საჭიროების შემთხვევაში, მთავრობა აგრესიული ტესტირების გამოყენების შესაძლებლობას განიხილავს.

"აგრესიული ტესტირება გულისხმობს ყველა იმ კლასტერის მოცვას და ზუსტ ცოდნას, რომელ ჯგუფში არის გავრცელებული კორონავირუსი. მსგავსი ტესტირებები გრიპის ვირუსზეც მიმდინარეობს, მიღებული პრაქტიკაა, რითიც ვაიდენტიფიცირებთ, არის თუ არა ეპიდემია", — განმარტა ეკატერინე ტიკარაძემ.

მინისტრმა მთავრობის ადმინისტრაციაში გამართული შეხვედრის შემდეგ თქვა, რომ მიმდინარეობს მოლაპარაკებები კორეასთან და ჩინეთთან, რათა საქართველოს, საჭიროების შემთხვევაში, ჰქონდეს მოსახლეობის მასიური ტესტირების რესურსი.

"დამაიმედებელი პასუხებია, რომ კვირის ბოლოს კონკრეტულ რაოდენობებზე გვექნება საუბარი. საელჩო ჩამოიტანს და საჭიროების შემთხვევაში, როცა მოსახლეობაში დავაფიქსირებთ გარკვეულ უკონტროლო ზრდას, გვექნება რესურსი, რომ მოვახდინოთ მასიური ტესტირება", — ამბობს მინისტრი.

მან ასევე აღნიშნა, რომ ასეთ შემთხვევაში, ისეთი პაციენტები, რომლებსაც ექნებათ მსუბუქად გამოვლენილი ფორმები, სახლში მიიღებენ ოჯახის ექიმის რეკომენდაციას.

აგრესიულ ტესტირებასთან დაკავშირებით მცირე განმარტება გააკეთა დაავადებათა კონტროლის ეროვნული ცენტის ხელმძღვანელის მოადგილე პაატა იმნაძემაც:

"როცა სიტუაცია მოითხოვს, მაშინ დაიწყება ეს და ეს განხორციელდება მაქსიმალურად ბევრ ადგილას. ეს იქნება მეოთხეული გადაცემის მერე, უფრო ფართო გავრცელების დროს".

ჯანდაცვის მინისტრის თქმით, კორონავირუსთან ბრძოლის კუთხით სხვადასხვა ქვეყნის გამოცდილებას აკვირდებიან, კერძოდ, როგორ მართავენ და მკურნალობენ ისინი ვირუსს. მინისტრი აღნიშნავს, რომ მაგალითად, კორეამ, სწორედ აგრესიული ტესტირების საშუალებით ბევრი ფაქტის ადრეულ ეტაპზე გამოვლება და შემდეგ ეფექტური მენეჯმენტი შეძლო.

ჯერჯერობით უცნობია, სად ჩატარდება ტესტირება და იქნება თუ არა ეს ლუგარის ლაბორატორია. ჯანდაცვის მინისტრი ამბობს, რომ ეს დეტალური გეგმის გაწერის შემდეგ გახდება ცნობილი.

ეპიდსიტუაცია საქართველოში: შეზღუდვები და რეკომენდაციები

18 მარტის მდგომარეობით, საქართველოში კორონავირუსი დაუდასტურდა 38 ადამიანს, მათ შორის 4 ბავშვია. ამასთან, დადასტურებულ შემთხვევებს შორის ერთი, N1 ინფიცირებული უკვე გამოჯანმრთელდა და ის საავადმყოფოდან 14-დღიანი თვითიზოლაციის რეკომენდაციით გაწერეს. კარანტინის რეჟიმში რჩება 1 261 ადამიანი, სტაციონარში მეთვალყურებოსი ქვეშ — 216.

დაავადებათა კონტროლის ცენტრის დირექტორის განცხადებით, ამ ეტაპზე სიტუაცია კონტროლიდებადია, თუმცა, შესაძლოა, მომდევნო კვირას ინფექციის პირველწყარო ვეღარ დაადგინონ. ჯანდაცვის მინისტრის განმარტებით, ასეთ შემთხვევაში, შესაძლოა, დაავადებულთა რაოდენობა 80-100-მდე გაიზარდოს და პიკური მომდენტი დადგეს. ინფიცირების რისკის ზრდის შემთხვევაში, მთავრობა შეზღუდვების გამკაცრებას გეგმავს და კარანტინის გამოცხადებას არ გამორიცხავს.

რაც შეეხება მოქმედ შეზღუდვებს, ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის. ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული, მათ შორის, კაფე-ბარებსა და რესტორნებს. აკრძალულია სამარშრუტო ტაქსების გადაადგილება და სრულად შეზღუდულია სპორტ დარბაზებისა და სპა ცენტრების ფუნქციონირება. ასევე, 70 წელს ზევით მოქალაქეებს თვითიზოლაციაში დარჩენა ურჩიეს.

შეზღუდვები შეეხოთ ჟურნალისტებსაც, პარლამენტში მათ მხოლოდ კონკრეტული ლოკაციებიდან მუშაობის უფლება აქვთ, მთავრობის ბრიფინგებზე კი მათი დაშვება აიკრძალა. მედიები ბრიფინგის საერთო სიგნალს მიიღებენ და კითხვებს წინასწარ გაგზავნიან.

მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს და დარღვევის შემთხვევაში ისინი იძულებით კარანტინში გადაყავს. ამ ეტაპზე იძულებით კარანტინშია გადაყვანილი 99 ადამიანი. პარლაენტი განიხილავს, რომ თვითიზოლაციის წესების დარღვევა დასჯადი გახდეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: