დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

თბილისის ინფექციური საავადმყოფოს სამედიცინო დირექტორის, მარინა ეზუგბაიას თქმით მათ საავადმყოფოში გუდაურიდან შეყვანილ არცერთ კონტაქტს კორონავირუსი არ დაუდასტურდა. ამის შესახებ ექიმმა ჟურნალისტებთან საუბრისას აღნიშნა.

"გუდაურის რამოდენიმე შესაძლო შემთხვევა ჩვენთან შემოყვანილი იყო სადიაგნოსტიკოდ. მათთან გამოირიცხა ეს დაავადება და გადაყვანილნი არიან საკარანტინო სივრცეში. რამოდენიმე ასეთი კონტაქტის კვლევა მოხდა, მაგრამ ნეგატიური იყო რამოდენიმე შემთხვევა", — თქვა მარინა ეზუგბაიამ.

16 მარტს მთავრობის გადაწყვეტილებით საქართველოს სამთო-სათხილამურო კურორტები დაიხურა. გადაწყვეტილება უკავშირდება ჩეხ ტურისტს, რომელსაც გუდაურში მოგზაურობის დროს კორონავირუსის სიმპტომები გამოუვლინდა, ხოლო სამშობლოში დაბრუნების შემდეგ ვირუსი დაუდასტურდა. მინისტრის თქმით, ტურისტი საქართველოს საელჩოს თვითონ დაუკავშირდა და ინფიცირების შესახებ აცნობა.

ჯანდაცვის სამინსიტროს განცხადებით, კორონავირუსით ინფიცირებულ ტურისტებთან კონტაქტში მყოფი 30 ადამიანია იდენტიფიცირებული, რომელთაგან 3-ს გამოხატული სიმპტომები აქვს. მათივე განცხადებით, ეს რიცხვები ჯერჯერობით დაზუსტებული არაა და კონტაქტების კვლევა გრძელდება.

17 მარტს მთავრობამ კორონავირუსთან დაკავშირებით ახალი შეზღუდვები და რეკომენდაციებიც გაავრცელა. პრემიერმა კი ხაზი გაუსვა, რომ მათი შესრულება სავალდებულოა.

გაიგეთ მეტი ახალ რეკომენდაციებზე:

პანდემია და რეკომენდაციები

18 მარტის მონაცემებით, საქართველოში კორონავირუსით ინფიცირების 38 შემთხვევაა დაფიქსირებული. ერთ ახალ შემთხვევაზე დღეს ინფექციური საავადმყოფოს დირექტორმა, მარინა ეზუგბაიამ განაცხადა.

38-დან ერთი, პირველი პაციენტი, რომელიც ირანიდან შემოვიდა გამოჯანმრთელდა და გუშინ საავადმყოფოდან გაწერეს. კარანტინში რჩება 1130 ადამიანი, სტაციონარში — 81.

მას შემდეგ, რაც ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად გამოაცხადა, საქართველოს მთავრობა და უწყებათაშორისი საკოორდინაციო საბჭო მუშაობის საგანგებო რეჟიმზე გადავიდა და შეზღუდვები და რეკომენდაციები გაავრცელა. ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის. ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული ისევე, როგორც კაფე-ბარებსა და რესტორნებს. ასევე, 70 წელს ზევით მოქალაქეებს თვითიზოლაციაში დარჩენა ურჩიეს.

მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს და დარღვევის შემთხვევაში ისინი იძულებით კარანტინში გადაყავს. ასევე, შეიქმნება სპეციალური მექანიზმი, რომელიც საკოორდინაციო საბჭოს გადაწყვეტილებების აღსრულებას შეამოწმებს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: