შეგიძლიათ, წარმოიდგინოთ, რამდენია მილიარდი? ადამიანების უმრავლესობისთვის ეს საკმაოდ რთული წარმოსადგენია. იმისთვის, რომ დიდი რიცხვების ვიზუალიზაცია გაეადვილებინა, ტიკტოკერმა ჰამფრი იანგმა ბრინჯი გამოიყენა. ერთი ბრინჯის მარცვალი = $ 100 000. მოგვიანებით კი, როცა პირველ ვიდეოს კარგი გამოხმაურება მოჰყვა, ტიკტოკერმა ჯეფ ბეზოსის ქონებაც გვაჩვენა ბრინჯის მარცვლებით.

სწორედ ამ ვიდეოს ნახვისას გადავწყვიტეთ, რომ ბიძინა ივანიშვილის ქონება ბრინჯის მარცვლებით გადაგვეთვალა. თუ ვიდეო საინტერესო არ გამოვიდოდა, უბრალოდ ჩვენი ახალშექმნილი ტიკტოკ-ანგარიშის შავბნელ პერიოდად მოვიხსენებდით და თუ კარგი გამოვიდოდა, მაშინ სხვა პლატფორმებზეც გადმოვიტანდით. პრინციპში, არაფერს ვკარგავდით, ბრინჯში გადახდილი თანხის გარდა.

ოფისთან არსებული მაღაზიიდან ბრინჯი ამოვიტანეთ და საქმეს შევუდექით.

ყველაზე რთული ნაწილი მილიარდის დათვლა იყო. მთელი განყოფილება ვითვლიდით ერთად და ჟურნალისტები დროდადრო ბუზღუნებდნენ, რომ მათ სამსახურეობრივ მოვალეობებში კონკიასავით ბრინჯის თვლა ნამდვილად არ ეწერა.

დაახლოებით 2-საათნახევარი დაგვჭირდა დასათვლელად და დავრწმუნდით, რომ მილიარდი მართლაც არაა ცოტა.

მერე მილიარდი დოლარის ტოლფასი ბრინჯის მარცვალი ჭიქაში გადავანაწილეთ და ვნახეთ, რომ ერთ ჭიქაზე ცოტა მეტი იყო. რაც ვერ ჩაეტია, თავიდან გადავთვალეთ, რომ სხვა ჭიქებისთვისაც იმდენივე რაოდენობა დაგვემატებინა.

ბოლოს და ბოლოს კი, ბიძინა ივანიშვილის ქონებამდეც მივედით.

ვიდეოს ამ მომენტისათვის 5117 ლაიქი და 72 000-მდე ნახვა აქვს.

ნახეთ ვიდეო და გამოგვყევით ტიკ-ტოკზე, რა იცით, კიდევ რას ვშვრებით:

@on.ge

როგორ დავთვალეთ ბიძინა ივანიშვილის ქონება (5,37 მლრდ) ბრინჯით 🍚👌🏻 #ბიძინაივანიშვილი #ბრინჯი ##ForYou ##fyp ##onge idea ©️@humphreytalks

♬ original sound - _redaura_

პ.ს. გადაღებისას ბრინჯის არც ერთი მარცვალი არ დაშავებულა.