დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

16 მარტის სიახლეები წაიკითხეთ აქ

15 მარტის მდგომარეობით:

  • 167 759 დადასტურებული შემთხვევა მსოფლიოში
  • 6 456 გარდაცვლილი
  • 76 589 გამოჯანმრთელებული

საქართველოში:

  • კორონავირუსის დადასტურებული შემთხვევა — 33
  • კარანტინის რეჟიმში — 427
  • სტაციონარში მეთვალყურეობის ქვეშ — 73

დღის მთავარი ჰედლაინი მსოფლიო მედიაში:

დონალდ ტრამპის პირველი ტესტის შედეგები კორონავირუსზე უარყოფითია

ფოტო: Getty Images

ამერიკის შეერთებული შტატების პრეზიდენტმა, დონალდ ტრამპმა კორონავირუსზე ტესტი ჩაიატარა, რომლის შედეგიც უარყოფითია. ამის შესახებ ინფორმაცია თეთრი სახლის ექიმმა გაავრცელა.

ტრამპმა კორონავირუსის ტესტი მას შემდეგ ჩაიტარა, რაც სოციალურ ქსელში გავრცელდა ინფორმაცია, რომ ბრაზილიის პრეზიდენტსა და მისი დელეგაციის წევრებს, რომელსაც ის შეხვდა, კორონავირუსი დაუდასტურდათ. ბრაზილიის პრეზიდენტმა განაცხადა, რომ მისი ტესტის შედეგი უარყოფითია.

დღის ფოტო: "ხალხის საცობი" აშშ-ის აეროპორტში

ფოტო: Austin Boschen / AP

ამერიკის შეერთებული შტატების აეროპორტებში "ხალხის საცობები" შეიქმნა იმის გამო, რომ ფრენების გაუქმების შემდეგ მოსახლეობა ქვეყანაში ერთდროულად დაბრუნდა, თითოეული მათგანის თერმოსკრინინგმა კი დიდი დრო წაიღო.

დღის დამაიმედებელი ამბავი

ფოტო: Getty Images

მიუხედავად იმისა, რომ ყოველდღიურად იზრდება ინფიცირებულთა რიცხვი, საიმედო სტატისტიკა ფიქსირდება გამოჯანმრთელების მხრივაც. მსოფლიოს მასშტაბით კორონავირუსისგან 76 598 ადამიანი განიკურნა.

ჩინეთში ინფიცირებების ახალმა შემთხვევებმა საგრძნობლად იკლო, გამოჯანმრთელებულთა რიცხვი კი 66 000-ს გადაცდა. გამოჯანმრთელების მაღალი მაჩვენებელია ირანშიც, რომელიც რამდენიმე კვირის წინ ინფიცირების მეორე ყველაზე მასშტაბურ კერად ითვლებოდა. ირანში ვირუსისგან 4 000-ზე მეტი ადამიანი განიკურნა.

რა ხდება მსოფლიოში:

  • ესპანეთის პრემიერ-მინისტრის ცოლს კორონავირუსი დაუდგინდა;
  • უნგრეთში კორონავირუსით გარდაცვალების პირველი შემთხვევა დაფიქსირდა;
  • ყაზახეთმა საგანგებო მდგომარეობა გამოაცხადა და ქვეყანაში შესვლასა და გასვლაზე შეზღუდვები დააწესა;
  • ავსტრალიამ ქვეყანაში შემსვლელი ყველა პირი დაავალდებულა, 14-დღიან თვითიზოლაციაში იყოს;
  • კენიამ საზღვარი ყველა უცხო ქვეყნის მოქალაქისთვის ჩაკეტა. ქვეყანაში შესვლა მხოლოდ კენიის მოქალაქეებსა და ბინადრობის უფლების მქონე პირებს შეუძლიათ, თუ 14-დღიან კარანტინს გაივლიან;
  • ავსტრიამ 5 და მეტი ადამიანის შეკრება აკრძალა;
  • ირანმა ერაყთან და ქუვეითთან სახმელეთო გზით ტვირთის გადაზიდვის შეზღუდვა გაურკვეველი დროით გაახანგრძლივა;
  • მაროკომ როგორც ქვეყნიდან გარეთ, ისე ქვეყანაში ყველა საერთაშორისო ფრენა შეაჩერა;
    პრევენციისთვის მაიამიში South Beach-ის ყველაზე პოპულარული სანაპიროები დაიხურა;
  • ისრაელის პრემიერის, ბენიამინ ნეთანიაჰუს კორუფციასთან დაკავშირებული სისხლის სამართლის საქმის განხილვა კორონავირუსის გამო გადაიდო;
  • კორონავირუსის პრევენციისთვის გაცემული რეკომენდაციების მიუხედავად, ბრაზილიაში ანტისამთავრობო მიტინგები გრძელდება;

რა ხდება საქართველოში:

სამწუხაროდ, მოლოდინი არ გამართლდა და 15 მარტს, პირველი გამოჯანმრთელების ნაცვლად, საქართველოში ისევ დაავადებულთა რიცხვის მატება გვაქვს. დღეს კორონავირუსით ინფიცირების 3 ახალი შემთხვევა დაფიქსირდა და რაოდენობა 33-მდე გაიზარდა. მათ შორის, ინფიცირების პირველი შემთხვევა გამოვლინდა ბათუმში.

პირველ ინფიცირებულ პაციენტს კი, განმეორებით ტესტზე "ძალიან, ძალიან სუსტი", თუმცა დადებითი პასუხი დაუფიქსირდა. შეგახსენებთ, რომ მისი პირველი ტესტის პასუხი ვირუსზე უარყოფითი იყო და არსებობდა მოლოდინი, რომ მეორეც ასეთივე იქნებოდა. NCDC-მ ის გამოჯანმრთელებულად არ ჩათვალა და განმეორებითი ტესტი ჩაუტარა, რომლის შედეგებსაც ხვალ გავიგებთ.

იყო კარგი სიახლეც, მესამე პაციენტს, რომელსაც ირანში მოგზაურობის ისტორია ჰქონდა, პირველ ტესტზე უარყოფითი პასუხი აღმოაჩნდა. დასაზუსტებლად მას მეორე ტესტი უტარდება და შესაძლოა, ხვალ ქვეყანაში პირველი გამოჯანმრთელებული გვყავდეს.

კიდევ ერთი სამწუხარო სიახლე თვითიზოლაციის დამრღვევ პირებს ეხება. დღეს შსს-მ 20 მათგანი გადაიყვანა იძულებით კარანტინში. ჯამში, უკვე 46 ადამიანი გვყავს, რომელმაც რეკომენდაციები არ გაითვალისწინა და თვითიზოლაცია დაარღვია.

გარდა ამისა, დღეს პრევენციის მექანიზმის ფარგლებში ახალი შეზღუდვების შესახებ გახდა ცნობილი. კერძოდ:

დღის მთავარ თემად ისევ საპატრიარქო დარჩა. დღეს საქართველოს მართლმადიდებელი ეკლესიის ისტორიაში პირველად, ზიარება მცირედი ცვლილებით ჩატარდა. ცვლილებები არ შეხებია ზიარებისთვის საერთო კოვზს. ეკლესიამ მრევლს მხოლოდ იმის უფლება მისცა, რომ ზიარების შემდგომი სასმელი ე.წ. სიტკბოება ერთჯერადი ან პირადი ჭიქებით დაელიათ.

აღსანიშნავია ისიც, რომ სასულიერო პირებმა თავი არ დაიშურეს და ზიარების ერთჯერადი კოვზებით ჩატარებაზე კრიტიკა ამბიონიდან დღესაც ისმოდა.

ერთი ამბავი, რომელმაც დღეს გაგვაღიმა

იტალიაში, ესპანეთში, გერმანიაში, საფრანგეთში და ყველა იმ ქვეყანაში, სადაც უსაფრთხოების ზომები გამკაცრდა, თვითიზოლაციაში და კარანტინში მყოფმა ადამიანებმა მნიშვნელოვანი აღმოჩენა გააკეთეს: ფანჯრები კარგი გასართობია. თუკი აქამდე ფანჯრებს მხოლოდ მზის შუქის შემოსაშვებად და გასანიავებლად იყენებდნენ, ახლა ათასობით ადამიანი ფანჯრების დახმარებით ინარჩუნებს გარესამყაროსთან კავშირს.

სწორედ ფანჯრების დახმარებით მოახერხეს კარანტინში მყოფმა ესპანეთის მოქალაქეებმა ყველას გაეგო, თუ როგორ სცემენ პატივს კორონავირუსთან მებრძოლ ექიმებს.

დღის რჩევა: როგორ დავიბანოთ ხელები სწორად

დღეს რამდენიმე სხვადასხვა მეთოდს გაგიზიარებთ, რომლებიც ხელების სწორად დაბანაში შეგიწყობთ ხელს. თუ გავითვალისწინებთ ძველ ქართულ ანდაზას — "გამეორება ცოდნის დედაა" — ეს ინფორმაცია ზედმეტი არასდროს იქნება.

მიჰყევით WHO-ს ილუსტრირებულ ინსტრუქციას და იღიღინეთ Happy Birthday

ფოტო: WHO / On.ge

თუ ილუსტრაციები არ მოგწონთ და კითხვა გეზარებათ, უყურეთ ცნობილი ბრაზილელი ფეხბურთელის ალისონ ბეკერის ვიდეოს და დაიმახსოვრეთ

თუ ფეხბურთზე მეტად მუსიკა გიტაცებთ, მაშინ გლორია გეინორის ვიდეოზე ივარჯიშეთ და I Will Survive იმღერეთ

@gloriagaynor

It only takes :20 seconds to “SURVIVE!”👏💕🎶 ##iWillSurviveChallenge ##fyp ##coronavirus ##handwashing

♬ I Will Survive - Gloria Gaynor

თუ არც ფეხბურთია თქვენი ძლიერი მხარე და არც მუსიკა, თან გინდათ ხელების დაბანა სახალისოდ იქცეს, მაშინ ელენ დეჯენერესის რჩევები გაითვალისწინეთ

და ბოლოს, თუ იმდენად ზარმაცი ხართ, რომ ყველა ამ ვიდეოს ნახვა ისევე დაგეზარათ, როგორც ხელების კარგად დაბანა, მაშინ მიბაძეთ ამ ადამიანებს და გაიკარით ხელსაბანთან NCDC-ის დირექტორის ფოტო.

ერთად თავმოყრილი რეკომენდაციები: