ზვარეში მეექვსე დღეა რკინიგზის მშენებლობაზე დასაქმებული მუშების პროტესტი გრძელდება. აქციის ერთ-ერთი მონაწილე გიორგი თაბუკაშვილი On.ge-სთან საუბარში ჰყვება, რომ დღევანდელ პროტესტს თბილისიდან, ქსანიდან, ჭიათურიდან და ტყიბულიდან ჩასული მოსახლეობა შეუერთდა. ასევე აქციაში მონაწილეობს პროფკავშირის წარმომადგენლები. გიორგი თაბუკაშვილის თქმით, მოთხოვნები იგივე რჩება, რომ დამსაქმებელი კომპანიის მენეჯმენტი უნდა შეიცვალოს:

"კომპანიის მხრიდან გვითხრეს, რომ ყველას ვერ და მხოლოდ ერთეულებს გაათავისუფლებდნენ მაგრამ ერთეულები კი არა ბევრია გასაშვები. ჩვენ არ ვითხოვთ ყველას გაშვებას, ვინ კი გასაშვებია ყველა უნდა გაუშვან".

გიორგი თაბუკაშვილი აღნიშნავს რომ ამ ხნის განმავლობაში, ხელისუფლების წარმომადგენელი მათ პროტესტს არ გამოხმაურებია:

"ხელისუფლების მხრიდან აბსოლიტურად არავინ შეგვხმიანებია. მათ არ სურთ, თუ რა ხდება არ ვიცი. მოვითხოვთ, რომ ვინმე ჩამოვიდეს და მოგვაქციოს ყურადღება".

მისივე განცხადებით რკინიგზის დეპარტამენტი ვალდებულია რომ მათი გაცდენილი დღეები ანაზღაურდეს:

"ჩვენ უკანონოდ არ ვიქცევით. უნდა აიღოს ეს თავის თავზე რკინიგზის დეპარტამენტმა".

3 ნოემბერს, ხარაგაულის რაიონის სოფელ ზვარეში, რკინიგზის ლიანდაგის მშენებლობაზე დასაქმებული რამდენიმე მუშა კომპანია ჩინეთის რკინიგზის 23-ე ბიუროს წარმომადგენლებმა სცემეს. დღის ბოლოს, სხეულის განზრახ ნაკლებად მძიმე დაზიანების ბრალდებით, ჩინეთის სახალხო რესპუბლიკის სამი მოქალაქე დააკავეს.