ახალგაზრდა ირლანდიელი მსახიობი, ჯეკ გლისონი, რომელმაც მაყურებლებს თავი ცნობილ სერიალ Game of Thrones-ში შესრულებული როლით დაამახსოვრა, ექვსწლიანი შესვენების შემდეგ ეკრანებზე ბრუნდება.

სულ ცოტა ხნის წინ დაანონსდა, რომ BBC ახალ სატელევიზიო შოუ Out of Her Mind-ზე იწყებს მუშაობას, რომლის სამსახიობო გუნდში ერთ-ერთ ადგილს სწორედ ჯეკ გლისონი დაიკავებს.

ახალი სერიალი კომედიური ჟანრის იქნება და სიტკომის სტილში მოგვითხრობს ერთი ოჯახის ისტორიას, რომელიც სავსე იქნება ექსცენტრიკული პერსონაჟებით, სამეცნიერო ნიუანსებითა და ანიმაციური ვიზუალებით.

ჯეკ გლისონი HBO-ს საკულტო სერიალ Game of Thrones-ში 2011 წელს გამოჩნდა და ერთ-ერთი მნიშვნელოვანი პერსონაჟის, ჯოფრი ბარათეონის როლს ასრულებდა. მსახიობი ოთხი სეზონის განმავლობაში შთამბეჭდავად ასრულებდა ამ ერთ-ერთი ყველაზე ცნობილი ანტიგმირის როლს, თუმცა 2014 წლის შემდეგ ის არცერთ პროექტში აღარ გვიხილავს.

ფოტო: HBO

ახალი სერიალი, რომელშიც ჯეკ გლისონს ვიხილავთ, BBC Two-სა და Sony Pictures Television-ის საერთო პროდუქტი იქნება. მის შექმნაზე საიმონ პეგი და ნიკ ფროსტი იმუშავებენ.

"ახალ შოუს შესანიშნავი სამსახიობი გუნდი ჰყავს და ერთი სული მაქვს, როდის ნახავს მაყურებელი, თუ რა გამოგვივიდა", — განაცხადა სერიალის პროდიუსერმა, საიმონ პეგმა.

ჯერჯერობით უცნობია, თუ როდის იქნება Out of Her Mind-ის პრემიერა, თუმცა ჯეკ გლისონის ახალი სამსახიობო როლის შესაფასებლად დალოდება ნამდვილად ღირს.