მას შემდეგ, რაც გამომცემლობა Hachette-მ განაცხადა, რომ ცნობილი რეჟისორის, ვუდი ალენის მემუარებს აღარ გამოსცემდა, ამ ფაქტს არაერთგვაროვანი გამოხმაურება მოჰყვა: მიუხედავად იმისა, რომ ადამიანების გარკვეული ნაწილი სწორედ ამას ითხოვდა, ეს გადაწყვეტილება მაინც ბევრმა გააკრიტიკა. მათ შორის აღმოჩნდა ცნობილი ამერიკელი მწერალი, სტივენ კინგი:

"გამომცემლობის გადაწყვეტილებამ, რომ ვუდი ალენის წიგნი აღარ გამოსცეს, ძალიან შემაშფოთა. ოღონდ არა ვუდი ალენის გამო, მე ის საერთოდ არ მადარდებს, უბრალოდ ის მაღელვებს, თუ ვინ იქნება შემდეგი, ვისაც მსგავსად პირს აუკრავენ", — დაწერა მწერალმა ტვიტერზე.

გასულ კვირას დაანონსდა, რომ 7 აპრილს ვუდი ალენის ავტობიოგრაფიული ნაწარმოები Apropos of Nothing გამოქვეყნდებოდა, რასაც რეჟისორის შვილებისგან საჯარო კრიტიკა მოჰყვა: ცნობილმა ჟურნალისტმა, რონან ფეროუმ Hachette-სთან თანამშრომლობა შეწყვიტა, რადგან ამავე გამომცემლობამ გასულ წელს სწორედ რონან ფეროუს წიგნი Catch And Kill გამოაქვეყნა, რომელიც ჰოლივუდში სექსუალური შევიწროების ცნობილი გამოძიების შესახებ მოგვითხრობს.

რონან ფეროუ მხარს უჭერს თავის დას, დილან ფეროუს — მისი თქმით, მასზე რეჟისორმა მაშინ ძალადა, როცა ჯერ კიდევ 7 წლის იყო. და-ძმის პროტესტს მხარი დაუჭირა გამომცემლობის ათეულობით თანამშრომელმა და მათ კომპანია პროტესტის ნიშნად დატოვეს.

სწორედ ამის შემდეგ გაავრცელა გამომცემლობამ განცხადება, რომლის მიხედვითაც ვუდი ალენის წიგნის გამოცემა გადაიფიქრეს: განცხადების მიხედვით, იმასთან ერთად, რომ გამომცემლობა მზადაა "განსხვავებული ხმები და დაპირისპირებული მოსაზრებები მოისმინოს", ამავდროულად "მხარს უჭერს თავის თანამშრომლებს", რის გამოც წიგნს ვეღარ გამოსცემს.

როგორც ჩანს, საშინელებათა ჟანრის საკულტო მწერლისთვის, სტივენ კინგისთვის სწორედ შეზღუდვის ეს ფორმა აღმოჩნდა მიუღებელი:

"თუ ფიქრობ, რომ ის პედოფილია, უბრალოდ ნუ იყიდი მის წიგნს, ნუ წახვალ კინოში მისი ფილმების სანახავად და ნუ მოუსმენ მის მიერ შესრულებულ ჯაზს. უბრალოდ უარი თქვი შენი ფულით მის დაფინანსებაზე — აი, ამერიკაში სწორედ ასე ვიქცევით".

მოგვიანებით სტივენ კინგმა ტვიტერის პირად ანგარიშზე კიდევ ერთი განცხადება გაავრცელა, რათა თავისი ამ ფაქტის მიმართ დამოკიდებულება დაეზუსტებინა და გამომცემლობის ან ვუდი ალენის ცალსახა მხარდამჭერად არ წარმოჩენილიყო:

"ასევე დავამატებ იმას, რომ რონან ფეროუს წიგნის გამოქვეყნების შემდეგ იმავე გამომცემლობამ ვუდი ალენის მემუარების გამოქვეყნება რომ მოინდომა, სრულიად შეუსაბამო და გაუგებარი გადაწყვეტილებაა".