ევროპის საბჭოს ვებგვერდზე გამოქვეყნდა ინფორმაცია წარწერით — აჭარის მაუწყებელში ჟურნალისტები პოლიტიკური ზეწოლის შედეგად გაათვისუფლეს, რომელშიც მაუწყებლიდან თანამშრომლების გათავისუფლების ქრონოლოგიაა აღწერილი. ტექსტი გამოქვეყნებულია პლატფორმაზე, სადაც ვრცელდება ინფორმაციები იმ ქმედებებზე, რომელიც მედიის თავისუფლებაზე გავლენას ახდენს. ვებგვერდზე მითითებულია, რომ ამ საკითხზე სახელმწიფოს ჯერ პასუხი არ გაუცია.

განცხადებაში წერია, რომ 28 თებერვალს რედაქტორის თანამდებობიდან გაათავისუფლეს შორენა ღლონტი, 19 თებერვალს კი მაია მერკვილაძე, რომლებიც საკვანძო ფიგურები იყვნენ დამოუკიდებელი სარედაქციო პოლიტიკის შენარჩუნებაში. გარდა ამისა, წერია, რომ 2 თებერვალს თანამდებობა დატოვა ნათია ზოიძემ, რომელმაც გადაწყვეტილება პოლიტიკური ზეწოლით ახსნა.

მითითებულია ისიც, რომ ჟურნალისტებმა არაერთხელ გააპროტესტეს ქართული ოცნების მიერ არჩეული წევრებით დაკომპლექტებული ბორდის მიერ ახალი დირექტორის, გიორგი კოხრეიძის არჩევა.

განახლება: თავდაპირველ ვერსიაში მითითებული იყო, რომ განცხადება ევროპის საბჭომ გაავრცელა, რაც ჩასწორდა დაზუსტების შემდეგ

აჭარის ტელევიზიის ჟურნალისტები მიიჩნევენ, რომ პროცესი უკეთესობისკენ არ იცვლება და ესკალაციისკენ მიდის. მათი განცხადებით, დირექტორს სურვილი აქვს რედაქცია შეცვალოს.

ამ ყველაფერს წინ უსწრებდა მაუწყებლის ახალი დირექტორის, გიორგი კოხრეიძის დაწყებული რეორგანიზაცია. მან უფლებამოსილება შეუმცირა თავის მოადგილეს, ნათია ზოიძეს, რომელსაც ამ მიზეზით არხიდან წასვლა მოუწია. გარდა ამისა, აღარ გაუგრძელა საინფორმაციო სამსახურის ერთ პროდიუსერს კონტრაქტი, ხოლო მეორეს — მთავარი გამოშვების პროდიუსერს, თანამდებობა გაუუქმა.

გუშინ, 4 მარტს კი აჭარის მაუწყებლის საინფორმაციო სამსახურის უფროსის მოვალეობის შემსრულებელლად დაინიშნა პირი, რომელიც სოციალურ ქსელებში ჰომოფობიური და სექსისტური შინაარსის გზავნილებით გამოირჩევა. ჟურნალისტების განცხადებით, მისი შერჩევის პროცესი გაუმჭვირვალე იყო. მათი თქმით, დირექტორს, აღნიშნულ თანამდებობაზე, ლაშა ზარგინავას ან ირინა ყურუას კანდიდატურას სთავაზობდნენ, თუმცა ეს არ გაითვალისწინეს.

ამავე თემაზე: