დაავადებათა კონტროლის ცენტრის ცხელი ხაზი 116 001

საქართველოს მუსლიმთა კავშირის თავმჯდომარის, ტარიელ ნაკაიძის თქმით, თუ კორონავირუსის გამო სახელმწიფოს მხრიდან ხალხმრავალი შეკრებების შეწყვეტის მკაცრი რეკომენდაცია იქნება, შესაძლოა პარასკევის ლოცვაც შეაჩერონ.

"თუ მკაცრი გაფრთხილება და სახელმწიფოს შესაბამისი უწყებიდან შესაბამისი რეკომენდაცია იქნება, რომ უნდა შეწყდეს ხალხმრავალი შეკრებები, ამ შემთხვევაში შესაძლებელია, გამოვიდეს მუსლიმთა ფეტვაც და შეჩერდეს პარასკევის ლოცვებიც კი. თუმცა, დღეს ამ მდგომარეობაში არ ვართ", — განაცხადა ნაკაიძემ TV პირველის ეთერში.

როგორც ნაკაიძე ამბობს, მიუხედავად იმისა, რომ ისლამში ზიარების რიტუალი და შეხების თვალსაზრისით დაავადების გადადების რისკი არაა, მაინც მოუწოდებენ მრევლს, რომ ლოცვებისას ერთამენთთან შეხვედრისას ტრადიციული გადახვევით მოკითხვისგან თავი შეიკავონ, ერთმანეთისგან შორს იდგნენ და თავი მაქსიმალურად დაიცვან.

საქართველოს მართლმადიდებელი ეკლესიის საპატრიარქო კი არ განიხილავს ზიარების წესის დროებით ცვლილებას ან შეზღუდვას ეკლესიებში "რაც არ უნდა მკაცრი იყოს ჯანდაცვის რეკომენდაციები". ამის შესახებ საპატრიარქოს პრესსპიკერმა, ანდრია ჯაღმაიძემ TV პირველის ეთერში ისაუბრა.

საქართველოში კორონავირუსით ინფიცირების 4 შემთხვევაა დადასტურებული. კორონავირუსით ინფიცირების პირველი შემთხვევა საქართველოში 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე შემთხვევა კი 5 მარტს დადასტურდა.

ამასთანავე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს.

გაიგეთ მეტი კორონავირუსის პრევენციის შესახებ: