Freedom House-ის ანგარიშის, "თავისუფლება მსოფლიოში 2020" თანახმად, საქართველო "ნაწილობრივ თავისუფალი" ქვეყნების სიაში, 100-დან 61 ქულით მოხვდა. საქართველოს პოზიცია გასულ წელთან შედარებით ორი ქულით გაუარესდა. 2019 წელს საქართველოს 63 ქულა, ხოლო 2018 წელს 64 ქულა ჰქონდა. 100 ქულა ნიშნავს "თავისუფალს", 0 "არათავისუფალს".

ანგარიში დღეს, 4 მარტს გამოქვეყნდა, სადაც წერია, რომ საქართველოს შესახებ ანგარიშის სიღრმისეული ნაწილი მოგვიანებით გამოქვეყნდება.

Freedom House-ის ანგარიშის მეთოდოლოგიის თანახმად, ფასდება პოლიტიკური უფლებები, კერძოდ: საარჩევნო პროცესი, პოლიტიკური პლურალიზმი და მონაწილეობა, მთავრობის მუშაობა. ამ ნაწილში საქართველომ მაქსიმალური 40 ქულიდან 24 მიიღო და გასულ წელთან შედარებით პოზიცია ერთი ქულით გაუარესდა.

შეფასების მეორე ნაწილია სამოქალაქო უფლებები, რაშიც ფასდება გამოხატვის თავისუფლება, კანონის უზენაესობა, ინდივიდუალური უფლებები. 2020 წლის ანგარიშში საქართველომ მაქსიმალური 60 ქულიდან 37 მიიღო, რაც ასევე, ერთი ქულით ჩამორჩება გასული წლის შედეგს.