ნინო ლომჯარია სახელმწიფო აუდიტის სამსახურის ხელმძღვანელის, ლაშა თორდიას პირველ მოადგილედ ინიშნება. ინფორმაციას ამის შესახებ ნეტგაზეთი ავრცელებს. როგორც ცნობილია, აღნიშნულ თანამდებობაზე ლომჯარიას დღეს, 2 საათზე, წარადგენენ.

ჰაინრიხ ბიოლის ფონდის ინფორმაციით, ნინო ლომჯარია იყო ISFED-ის აღმასრულებელი დირექტორი, რის შემდეგაც ამავე ორგანიზაციაში სხვა პოზიციაზე გააგრძელა მუშაობა. 2006 წელს მიღებული აქვს თსუ-ს მაგისტრის ხარისხი სამართალმცოდნეობაში, 2011 წელს კი - სენტ ლუისში ვაშინგტონის უნივერსიტეტის სამართლის მაგისტრის ხარისხი.

გარდა ამისა, 2015 წლიდან არის ევროპული საერთაშორისო სადამკვირვებლო ქსელის, ENEMO-ს გენერალური მდივანი. ამასთან, 2014 წლიდან ლომჯარია ევროპული სადამკვირვებლო ორგანიზაცია - EPDE-ს გამგეობის წევრიცაა.

სხვადასხვა წლებში ახალგაზრდა იურისტთა ასოციაციაში მუშაობდა. 2010 წელს იგი ვაშინგტონის უნივერსიტეტის სამართლის პროფესორის კვლევის ასისტენტის პოზიციას იკავებდა. ამასთან, ლომჯარია არის 15 კვლევის ავტორი არჩევნების მონიტორინგის, საჯარო ინფორმაციის ხელმისაწვდომობის, მედია გამჭვირვალობისა და ანტი კორუფციულ საკითხებზე.