29 თებერვალს ბერლინის საერთაშორისო კინოფესტივალის წლევანდელი გამარჯვებულები გამოვლინდნენ — მთავარი პრიზი, ოქროს დათვი ირანელი რეჟისორის, მოჰამად რასულოფის ფილმ There is No Evil-ს გადაეცა.

ბოლო წლებში ბერლინის კინოფესტივალმა ძველი დიდება დაკარგა, რისი გამოსწორებაც მთლიანად დირექციის შეცვლით სცადეს. ამის მიუხედავად, წელს კონკურსს კრიტიკის გარეშე მაინც არ ჩაუვლია: ჟიურის წლევანდელი თავჯდომარე, ჯერემი აირონსი წარსულში გაკეთებული განცხადებების გამო გააკრიტიკეს.

20 თებერვალს დაწყებული ფესტივალის ფავორიტები შვიდი წევრისგან შემდგარმა ჟიურიმ გამოავლინა. აღსანიშნავია, რომ მთავარი პრიზის მფლობელი რეჟისორი, მოჰამად რასულოფი დაჯილდოების ცერემონიას ვერ დაესწრო, რადგან ირანის მთავრობას მისთვის ქვეყნიდან გასვლის უფლება შეზღუდული აქვს.

მის ნაცლად სცენაზე მისი ოჯახი ავიდა და პრიზი მის შვილს გადასცეს.

დანარჩენ ნომინაციებში გამარჯვებულების სია კი ასე გამოიყურება:

  • ჟიურის გრან პრი — Never Rarely Sometimes Always, ელიზ ჰიტმანი;
  • საუკეთესო რეჟისორი (ვერცხლის დათვი) — The Woman Who Ran, ჰონგ სან სუ;
  • საუკეთესო მსახიობი ქალი — პაულა ბერი, Undine;
  • საუკეთესო მსახიობი კაცი — ელიო ჯერმანო, Hidden Away;
  • საუკეთესო სცენარი — Bad Tales, ფაბიო და დამიანო დინოჩენზები.