გაეროს გენერალური მდივანი, ანტონიო გუტიერეში, სირიის ჩრდილო-დასავლეთში, იდლიბის პროვინციაში ვითარების ესკალაციის გამო, შეშფოთებას გამოთქვამს და მხარეებს ცეცხლის დაუყოვნებლივ შეწყვეტისკენ მოუწოდებს. ამის შესახებ გაეროს პრესსპიკერის განცხადებაშია ნათქვამი.

"გენერალური მდივანი უაღრესად შეშფოთებული ადევნებს თვალს სირიის ჩრდილო-დასავლეთში სიტუაციის ესკალაციას და ავიაიერიშის შედეგად დაღუპული ათობით თურქი ჯარისკაცის შესახებ ინფორმაციას. გენერალური მდივანი აგრძელებს მოწოდებას ცეცხლის დაუყოვნებლივ შეწყვეტის შესახებ და განსაკუთრებულ შეშფოთებას გამოთქვამს იმ საფრთხის გამო, რაც სამხედრო მოქმედებების ესკალაციის შედეგად მშვიდობიან მოსახლეობას ემუქრება", — ნათქვამია განცხადებაში.

სირიის ჩრდილო-დასავლეთში, იდლიბის პროვინციაში მომხდარი საჰაერო თავდასხმის შედეგად მინიმუმ 33 თურქი ჯარისკაცი დაიღუპა და 30-ზე მეტი დაშავდა. ამის შესახებ ინფორმაციას საერთაშორისო მედია ავრცელებს. სხვა წყაროებით ვრცელდება ინფორმაცია, რომ დაშავებულების რაოდენობა უფრო მეტია.

თურქეთის ოფიციალური პირების განცხადებით, თავდასხმა სირიის სამთავრობო ძალებმა განახორციელეს. მათივე თქმით, რუსული რეაქტიული თვითმფრინავები წინა კვირის განმავლობაში ამ რეგიონში მიმდინარე თავდასხმებში იყვნენ ჩართულნი.

თურქული მედიის ინფორმაციით, პრეზიდენტმა რეჯეპ ტაიპ ერდოღანმა ხუთშაბათს ღამით ანკარაში საგანგებო შეხვედრა გამართა. შეხვედრის შემდეგ თურქეთის ძალები სირიის წინააღმდეგ დაპირისპირებაში ჩაერთვნენ.