არასამთავრობო ორგანიზაცია მწვანე ალტერნატივას განცხადებით, ეკონომიკის სამინისტროს მიერ გამოცხადებულ მინიმუმ 6 აუქციონში კანონდარღვევაა. მათი თქმით, გასაყიდად გამოტანილია ლიცენზიები, რომელთა შესახებ სკრინინგის განცხადებების განხილვა დასრულებული არაა.

ლიცენზიები სახელმწიფო პროგრამა 100 საინვესტიციო შეთავაზება ბიზნეს-ის ფარგლებში გამოცხადდა. ორგანიზაციაში ამბობენ, რომ აუქციონის გამოცხადებამდე წიაღის ეროვნულმა სააგენტომ უნდა მიმართოს. მწვანე ალტერნატივას განცხადებით, სკრინინგის პროცედურის დასრულების შემდეგ შეიძლება დადგინდეს, რომ ლიცენზიით სარგებლობა საჭიროებს გარემოზე ზემოქმედების შეფასებას (გზშ-ს). ამ შემთხვევაში ლიცენზიანტი ვალდებული ხდება გზშ-ს კვლევა ჩაატაროს. სკრინინგის შედეგი, ასევე, შეიძლება საქმიანობაზე უარის თქმის საფუძველი გახდეს.

მწვანე ალტერნატივა მიიჩნევს, რომ აუცილებელია გაუქმდეს კანონდარღვევით გამოცხადებული ქვემოთ ჩამოთვლილი აუქციონები:

• ხარაგაულის მუნიციპალიტეტში, სოფ. ღორეშას მიმდებარე ტერიტორიაზე, ღორეშას გამარმარილოებული (მოსაპირკეთებელი) კირქვის გამოვლინება (კატეგორია – P, მოსაპოვებელი წიაღისეულის ჯამური მოცულობა (სამივე უბანზე ერთად) – 890 625 მ³). სკრინინგის განცხადება — ხარაგაულის მუნიციპალიტეტში, სოფ. ღორეშას მიმდებარე ტერიტორიაზე სასარგებლო წიაღისეულის, 890625მ3 "ღორეშას" კირქვის (სხვა საშენი მასალა) მოპოვების პროექტი. საზოგადოებასთან კონსულტაციის ვადა 18 თებერვალს იწურება;
• თეთრიწყაროს მუნიციპალიტეტში, სოფ. წყორძას მიმდებარე ტერიტორიაზე, ქოსალარი II–ის (საყდარი) ბაზალტის საბადო (კატეგორია – A+B+C1, მოსაპოვებელი წიაღისეულის ჯამური მოცულობა – 1 576 000 მ³). სკრინინგის განცხადება — თეთრიწყაროს მუნიციპალიტეტში, სოფ. ქოსალარის მიმდებარე ტერიტორიაზე 1576000მ3 ქოსალარი II-ის (საყდარის) ბაზალტის (მოსაპირკეთებელი) მოპოვების პროექტი. საზოგადოებასთან კონსულტაციის ვადა 14 თებერვალს იწურება;
• ახალციხის მუნიციპალიტეტში, სოფ. ანდრიაწმინდას მიმდებარე ტერიტორიაზე, ოდუნდის ტუფობრექჩიის საბადო (კატეგორია – B+C1, მოსაპოვებელი წიაღისეულის (საღორღე ნედლეული) ჯამური მოცულობა – 3 398 000 მ³). სკრინინგის განცხადება — ახალციხის მუნიციპალიტეტში, სოფ. ანდრიაწმინდას მიმდებარე ტერიტორიზე, ოდუნდის ტუფობრექჩის მოპოვება. საზოგადოებასთან კონსულტაციის ვადა 13 თებერვალს იწურება;
• ნინოწმინდის მუნიციპალიტეტში, სოფ. კათნატუს მიმდებარე ტერიტორიაზე, ხანჩალის ტორფის საბადო (კატეგორია – A, მოსაპოვებელი წიაღისეულის ჯამური მოცულობა – 63 000 ტონა). სკრინინგის განცხადება — ნინოწმინდის მუნიციპალიტეტში, სოფ. კათნატუს მიმდებარე ტერიტორიაზე 63 000ტ ტორფის მოპოვება. საზოგადოებასთან კონსულტაციის ვადა 14 თებერვალს იწურება;
• თეთრიწყაროს მუნიციპალიტეტში, სოფ. წყორძას მიმდებარე ტერიტორიაზე, ქოსალარი II–ის (საყდარი) ბაზალტის საბადო (კატეგორია – A+B+C1, მოსაპოვებელი წიაღისეულის ჯამური მოცულობა – 1 576 000 მ³). სკრინინგის განცხადება — თეთრიწყაროს მუნიციპალიტეტში, სოფ. ქოსალარის მიმდებარე ტერიტორიაზე 1576000მ³ ქოსალარი II-ის (საყდარის) ბაზალტის (მოსაპირკეთებელი) მოპოვების პროექტი. საზოგადოებასთან კონსულტაციის ვადა 14 თებერვალს იწურება;
• ახალქალაქის მუნიციპალიტეტში, სოფ. მოდეგას მიმდებარე ტერიტორიაზე, მოდეგის ვულკანური წიდის საბადო (კატეგორია -A+B+C1, მოსაპოვებელი წიაღისეულის ჯამური მოცულობა – 20 701 700 მ³). სკრინინგის განცხადება — ახალქალაქის მუნიციპალიტეტში, სოფ. მოდეგას მიმდებარე ტერიტორიაზე 20701700 მ³ სასარგებლო წიაღისეულის (ვულკანური წიდის) მოპოვების პროექტი. საზოგადოებასთან კონსულტაციის ვადა 13 თებერვალს იწურება.

"ზემოაღწერილი კანონდარღვევის დაფარვას წიაღის ეროვნული სააგენტო გასაყიდი ლიცენზიის პირობებში შემდეგი ჩანაწერით ცდილობს: "ლიცენზიის მფლობელი ვალდებული იქნება: "…ლიცენზიით გათვალისწინებული საქმიანობის დაწყებამდე უზრუნველყოს, "გარემოსდაცვითი შეფასების კოდექსით" განსაზღვრული მოთხოვნების შესრულება". სკრინინგის გადაწყვეტილების არქონის პირობებში კოდექსით განსაზღვრული მოთხოვნები უკიდურესად ბუნდოვანია ლიცენზიის მაძიებლისათვის და მომავალში, შესაძლოა, დავის საფუძველიც გახდეს", — წერს მწვანე ალტერნატივა.

ორგანიზაციაში მიიჩნევენ, რომ აღნიშნული 6 ლიცენზიის აუქციონზე გატანას, შესაძლოა, ზეგავლენა ჰქონდეს გარემოს დაცვისა და სოფლის მეურნეობის სამინისტროში მიმდინარე სკრინინგის განცხადებების განხილვის პროცესზე.