რესპუბლიკური პარტიის ყოფილი წევრი და რეინტეგრაციის საკითხებში ასევე ყოფილი მინისტრი, პაატა ზაქარეიშვილი ამბობს, რომ რესპუბლიკურმა პარტიამ შეცდომები, რის გამოც საპარლამენტო ბარიერი ვერ გადალახა, უნდა ეძებოს პარტიის შიგნით და არა – გარეთ. ზაქარეიშვილმა ამის შესახებ ტელეკომპანია პირველის ეთერში დღეს ისაუბრა.

ზაქარეიშვილის თქმით, არჩევნებამდე, რესპუბლიკურ პარტიაში ორი ურთიერთდაპირისპირებული პოზიცია, პარტიის წევრთა ნაწილი ოცნებასთან კონფრონტაციულ დამოკიდებულებას ემხრობოდა, ნაწილი კი – უფრო თანამშრომლობას:

"გაიყო სტრატეგია. მე ვამბობდი, რომ ჩვენ არ უნდა ვიყოთ კონფრონტაციულები და ჩვენც უნდა ავიღოთ ჩვენ თავზე პასუხისმგებლობა როგორც ხელისუფლების ნაწილმა, იყო პოზიცია, რომელმაც გაიმარჯვა, რომ საზოგადოებამ უნდა ნახოს განსხვავება ქართულ ოცნებასა და რესპუბლიკურ პარტიას შორის. სამწუხაროდ, იმხელა განსხვავება ნახა საზოგადოებამ, ვერ ნახა განსხვავება ნაციონალურ მოძრაობასა და რესპუბლიკურ პარტიას შორის. ეს იყო ჩვენი ტრაგედია, რომ ისე გადავეშვით ოპოზიციურ ორომტრიალში, რომ ხალხმა თქვა, ბოლოს და ბოლოს, თქვენ ხელისუფლებაში იყავით თუ არ იყავით საერთოდ?"

როგორც ზაქრეიშვილი ამბობს, ის რესპუბლიკურ პარტიაში იმ შემთხვევაში დარჩებოდა, თუ პარტია საპარლამენტო ბარიერს გადალახავდა და პარლამენტში ფრაქციას შექმნიდა, ამით კი თავად ზაქარეიშვილი დარწმუნდებოდა თანაპარტიელების პოზიციის სისწორეში და შეცდომას აღიარებდა. თუმცა, როგორც ზაქარეიშვილი ამბობს, მისი პესიმისტური მოლოდინები პარტიის მომავალთან დაკავშირებით გამართლდა, რის გამოც მან პარტია დატოვა.