პარლამენტის თავმჯდომარეს, არჩილ თალაკვაძე სურს, რომ ქართული ოცნებიდან წასული, დამოუკიდებელი დეპუტატების ფრაქციის წარმომადგენლები საარჩევნო სისტემის შესახებ მოლაპარაკებებში ჩაერთონ. ამის შესახებ მან ჟურნალისტებს აშშ-დან დაბრუნების შემდეგ განუცხადა.

ქართული ოცნების ყოფილი დეპუტატებისგან შემდგარი ფრაქცია მზად არის, რომ მმართველი გუნდის მიერ ოპოზიციისთვის შეთავაზებული საარჩევნო მოდელით, 100/50-ით, 2020 წლის არჩევნების ჩატარებას მხარი დაუჭიროს. თუმცა ისინი ითხოვენ, რომ 2024 წლიდან საარჩევნო სისტემა იყოს პროპორციული და ხმის მიცემა ყველა მოქალაქისთვის სავალდებულო გახდეს.

არჩილ თალაკვაძის თქმით, შემდეგი დიალოგის ფარგლებში ისინი აღნიშნული მოთხოვნების განხილვას აპირებენ:

"და, ასევე, მე პირადად ვაპირებ, რომ კონსულტაციები გავმართო მოლაპარაკებების მხარეებთან და ფასილიტატორებთან, რომ დამოუკიდებელი დეპუტატების ჩართვაც მოხდეს".

მას შემდეგ, რაც ბიძინა ივანიშვილმა პირობა არ შეასრულა და ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გაერთიანდნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

მმართველ გუნდსა და ოპოზიციას შორის საარჩევნო სისტემასთან დაკავშირებით დიპლომატების მედიატორობით მოლაპარაკებების ფორმატი დაიწყო. მოლაპარეკებათა ოთხი რაუნდი უკვე გაიმართა. მმართველი გუნდი ოპონენტებს ახალ სამოქმედო გეგმას სთავაზობს. საუბარია იმაზე, რომ პარლამენტში პროპორციული წესით 100 დეპუტატი აირჩიონ, ნაცვლად 77-სა. ხოლო მაჟორიტარული მანდატები 50-მდე შემცირდება.

ევროპული საქართველოს დეპუტატის, გიგი უგულავას დაკავების შემდეგ კი ოპოზიციამ ხელისუფლებასთან მოლაპარაკაბები შეწყვიტა.