ბათუმში ოპოზიციის მხარდამჭერებმა და აქტივისტებმა უმაღლეს საბჭოსთან აქცია "სირცხვილის დერეფნები" გამართეს, რომელზეც კიდევ ერთხელ გააპროტესტეს პროპორციული საარჩევნო სისტემის კანონპროექტის ჩაგდება. აქცია პოლიციელებთან და დეპუტატებთან დაპირისპირების ფონზე წარიმართა.

მოძრაობა გაბედესა და ალტერნატივას აქტივისტებს ჰქონდათ სასტვენები და პლაკატები წარწერებით: "იაზროვნე, ეცადე მაინც", "დასაბმელი ოცნება", "თქვენ არ გენდობით" და სხვა. აჭარის ტელევიზიის ინფორმაციით, დეპუტატებმა პროტესტის ფორმა დაიწუნეს და შეკრებილებთან კამათი დაიწყეს, რის გამოც საქმეში პოლიცია ჩაერთო და ისინი განარიდა.

მომხდარს გამოეხმაურა საბჭოს თავმჯდომარემ დავით გაბაიძე და მომხდარის გამო ნაციონალური მოძრაობა გააკრიტიკა. მისი თქმით, თავად ასე არ იქცეოდა როცა ოპოზიციაში იყო და ოპონენტებს მსგავს დისკომფორტს არ უქმნიდა. მანვე აღნიშნა, რომ თავს დამნაშავედ არ გრძნობს იმის გამო, რომ ქართულ ოცნებას წარმოადგენს და რამდენჯერაც არ უნდა შეიკრიბონ აქციის მონაწილეები, საბჭო საქართველოს კონსტიტუციას ვერ შეცვლის.

საპროტესტო აქციას გამოეხმაურა საბჭოს ერთ-ერთი დამოუკიდებელი დეპუტატი მერაბ ბლადაძე. მან დაიფიცა, რომ ფიზიკურად იძალადებს ოპოზიციის მხარდამჭერებსა და აქტივისტებზე, თუ "სირცხვილის დერეფნების მოწყობას" გაბედავენ. პირად ფეისბუქგვერდზე მან დაწერა, რომ ასეთ ხალხს "თავს გაუტეხავს", თუნდაც ამის გამო მანდატის დატოვება მოუწიოს.