თბილისის მერიის გადაწყვეტილებით, გლდანში, თეიმურაზ ბოჭორიშვილისა (ხიზაბავრის) ქუჩაზე, ასფალტის საფარის აყრა და თავიდან დაგებაა საჭირო. ამის შესახებ ინფორმაციას თბილისის მერია ავრცელებს.

მათი განმარტებით, ლაბორატორიული კვლევით დადგინდა, რომ ბოჭორიშვილის ქუჩაზე ასფალტის საფარი, რომელიც კომპანია მილენიუმ ბილდერს გრუპმა დააგო, ნაწილობრივ არ აკმაყოფილებს ნორმით გათვალისწინებულ სტანდარტს.

მერიის ცნობით, ბოჭორიშვილის ქუჩის გზის საფარის ზედა ფენის დემონტაჟსა და მის თავიდან მოწყობაზე გლდანის გამგეობის ბიუჯეტიდან თანხა არ დაიხარჯება.

მათივე ინფორმაციით, აღნიშნული სამუშაოებისთვის გლდანის რაიონის გამგეობის ბიუჯეტიდან 1 581 739 ლარია გათვალისწინებული, თუმცა, ამ ეტაპზე გადარიცხულია 1 174 364 ლარი. სრული თანხა გადაირიცხება მას შემდეგ, როდესაც კომპანია დაასრულებს სამუშაოს შესაბამისი ხარისხის გათვალისწინებით და ეს დადასტურდება ლაბორატორიულად.