გენერალური პროკურორობის კანდიდატი და ყოფილი გენერალური პროკურორი, ირაკლი შოთაძე ამბობს, რომ თანამდებობაზე ყოფნისას იმ ხარისხის შეცდომა არ დამიშვია, რომ საქმიანობის პოზიტივი გადაეფარა. ამის შესახებ მან საპროკურორო საბჭოს გასაუბრებაზე იურიდიული კომიტეტის თავმჯდომარის, ანრი ოხანაშვილის კითხვაზე პასუხად განაცხადა, რომელიც შოთაძის საქმიანობას შეეხებოდა.

ოხანაშვილმა შოთაძეს ჰკითხა, აქვს თუ არა შოთაძეს საქმიანობის პერიოდში დაშვებული რაიმე შეცდომა. რაზეც შოთაძემ უპასუხა, რომ შეუცდომელი არავინაა და შეცდომებს ის უშვებს, ვინც რამეს აკეთებს.

"აქ საუბარია ხარისხზე. ყველაფერი ფასდება ხარისხობრივად. შესაბამისად, მე არ ვფიქრობ, რომ ჩემი საქმიანობის განმავლობაში ხარისხობრივად რაიმე ისეთი შეცდომა დამიშვია, რაც გადაწონიდა იმ პოზიტივს და იმ რეფორმებს, რაც ჩემი საქმიანობის პერიოდში განხორციელდა", — განაცხადა შოთაძემ.

გენერალური პროკურორის თანამდებობა ვაკანტური მას შემდეგ გახდა, რაც მოქმედი გენერალური პროკურორი შალვა თადუმაძე უზენაესი სასამართლოს უვადო მოსამართლედ დაინიშნა. გენერალური პროკურორობა 16 კანდიდატს სურს.

ოპოზიციისა და სამოქალაქო საზოგადოების კრიტიკა გამოიწვია შოთაძის კანდიდატურამ, რომელმაც თანამდებობა 2018 წელს, მას შემდეგ დატოვა, რაც თბილისის საქალაქო სასამართლოს გადაწყვეტილებით ხორავას ქუჩის საქმეზე არასრულწლოვანი დავით სარალიძის მკვლელი ვერ გამოვლინდა და საპროტესტო აქცია დაიწყო. შოთაძის გადადგომას მოკლულის მამა ზაზა სარალიძე და მისი მხარდამჭერები ითხოვდნენ.

პროკურატურიდან წასვლის შემდეგ შოთაძე ტექნიკურ უნივერსიტეტში საერთაშორისო სამართლის ფაკულტეტის მიწვეულ ასოცირებულ პროფესორად მუშაობდა. გარდა ამისა, ის სილქნეტის იურიდიული კონსულტანტი იყო. არასამთავრობოები მოუწოდებენ საპროკურორო საბჭოს, ირაკლი შოთაძის კანდიდატურას მხარი არ დაუჭირონ.