რუსეთი კორონავირუსით დაინფიცირებული უცხო ქვეყნის მოქალაქეების დეპორტაციას გეგმავს. ამის შესახებ რუსეთის პრემიერ-მინისტრმა, მიხაილ მიშუსტინმა განაცხადა.

მისივე თქმით, შემუშავებულია ეროვნული გეგმა, რომელიც ვირუსის შემოტანასა და გავრცელების თავიდან აცილებას ეხება. თვითონ ვირუსი კი განსაკუთრებით საშიში დაავადებების სიაში დაემატა.

"ეს [გეგმა] საშუალებას იძლევა მოხდეს უცხო ქვეყნის იმ მოქალაქეების დეპორტაცია, რომელთაც ეს დაავადება აღმოუჩნდებათ", — განაცხადა მიშუსტინმა.

რუსეთი კორონავირუსით დაინფიცირების მხოლოდ ორ შემთხევას ადასტურებს. ორივე პირი ჩინეთის მოქალაქეა. რუსეთმა ჩინეთთან სარკინიგზო და საჰაერო მიმოსვლა უკვე შეწყვიტა.

ახალი კორონავირუსის გამო 300-ზე მეტი ადამიანი გარდაიცვალა, დაინფიცირებულთა რიცხვმა კი 17 ათასს მიაღწია. ჩინეთს გარეთ გარდაცვალების პირველი შემთხვევა ფილიპინებში იყო.

მსოფლიოს რიგმა ქვეყნებმა ჩინეთიდან ჩამსვლელი მგზავრებისთვის საზღვრები ჩაკეტა. BBC-ის ცნობით, აშშ-სა და ავსტრალიის ოფიციალურმა პირებმა განაცხადეს, რომ უცხო ქვეყნის მოქალაქეს, რომელიც ბოლო პერიოდში ჩინეთში იყო, ქვეყანაში არ შეუშვებენ. მანამდე, მსგავსი აკრძალვა დააწესა რუსეთმა, იაპონიამ, პაკისტანმა და იტალიამ.

მსოფლიო ჯანდაცვის ორგანიზაცია მსგავსი ზომების წინააღმდეგია და აცხადებს, რომ მოგზაურობის აკრძალვას მეტი ზიანის მოტანა შეუძლია, ვიდრე სიკეთის. მათი თქმით, ეს დააზიანებს ეკონომიკას და გაართულებს ინფორმაციის გაზიარებას. WHO-ს რეკომენდაციაა, დაიწყოს სამედიცინო სკრინინგი სასაზღვრო გამშვებ პუნქტებში, რადგან ქვეყნებში არალეგალურად შესვლით, საზღვრების ჩაკეტვა დააჩქარებს ვირუსის გავრცელებას. მოგზაურობის აკრძალვა გააკრიტიკა ჩინეთმაც. საგარეო საქმეთა მინისტრის პრესსპიკერის, ჰუა ჩუნინგის თქმით, ეს ნამდვილად არ არის კეთილი ნების ჟესტი.

საქართველოში დაავადებათა კონტროლის ეროვნული ცენტრის ხელმძღვანელი, ამირან გამყრელიძე ამბობს, რომ პანიკის საფუძველი არ არსებობს. მისი თქმით, საქართველო დაბალი რისკის ქვეყანაა და ამ ეტაპზე კორონავირუსით ინფიცირებული ადამიანის არცერთი შემთხვევა არ დაფიქსირებულა.

ჯანდაცვის მსოფლიო ორგანიზაციამ კორონავირუსის გამო საერთაშორისო საგანგებო მდგომარეობა გამოაცხადა. ბრიფინგზე ორგანიზაციის წარმომადგენლებმა განაცხადეს, რომ ვირუსი კვლავ განაგრძობს გავრცელებას, საგანგებო რეჟიმის გამოცხადების მთავარ მიზეზად კი იმ ქვეყნების დაცვა დასახელდა, რომლებიც შეიძლება კორონავირუსთან გამკლავება თავად ვერ შეძლონ.