ენმ-მ საგანგებო ბრიფინგი გამართა და პარტიის ერთ-ერთმა წევრმა, თინა ბოკუჩავამ განაცხადა, რომ რამდენიმე საარჩევნო ოლქში დაპირისპირების საფრთხე არსებობს:

"გორში სპორტსმენების განსაკუთრებით დიდი კონცენტრაციაა სოფელ გარეჯვარში, 50-ე უბანთან, სადაც ამ ყველაფრის კოორდინაციას ახდენს ზურაბ მურადაშვილი. ჩვენ მოვუწოდებთ შსს-ს, რომ ახლავე მიიღოს ზომების იმისთვის, რომ არ მოხდეს პროვოკაციები ამ უბნებთან და განსაკუთრებით დათვლის დრო არ იყოს ისეთი ტიპის პროვოკაციები, როგორიც ჩვენ 8 ოქტომბერს ვიხილეთ. ასევე მნიშვნელოვანია ოქროყანა, სადაც კრიმინალური ავტორიტეტის მქონე ადამიანების საკმაოდ დიდი ჯგუფი იკრიბება. ისინი იღებენ ალკოჰოლს და მოსახლეობას აშინებენ. აქაც მივმართავთ შსს-ს, რომ მიავლინონ წარმომადგენლები, რომ არ მოხდეს რაიმე ძალადობრივი ან სხვა ტიპის დაპირისპირება. ვაზისუბანში, ისევე როგორც დიღომში, რამდენიმე დამკვირვებელს არ მისცეს გადაღების უფლება. რუსთავში დაფიქსირდა მოსყიდვის ფაქტი. ასევე რამდენიმე ადამიანია, სადაც დაფიქსირდა მარკირებიანი ადამიანების შესვლა რამდენჯერმე უბნებზე. ასეთივე ფაქტი დაფიქსირდა მთაწმინდაზეც, ისევე როგორც ისანში და მარნეულის მე-17 უბანზე".