იურიდიული კომიტეტის თავმჯდომარე, ანრი ოხანაშვილი ამბობს, რომ ოპოზიციისთვის შეთავაზებული საპარლამენტო მანდატების გადანაწილების ახალი ვერსია, მმართველი გუნდის პარტიულ ინტერესებს არ ეფუძნება. მისი თქმით, ეს შეთავაზება ქვეყნის გრძელვადიან განვითარებაზეა გათვლილი.

"ეს ეფუძნება პასუხისმგებლობის მქონე მმართველი გუნდის შეთავაზებას. გუნდის, რომელიც ფიქრობს არა მხოლოდ დღევანდელ დღეზე და საკუთარ პარტიულ ინტერესებზე, არამედ ფიქრობს ქვეყნის გრძელვადიან, მშვიდობიან და სტაბილურ განვითარებაზე", — განუცხადა ანრი ოხანაშვილმა რუსთავი 2-ს.

მას შემდეგ, რაც ბიძინა ივანიშვილმა პირობა არ შეასრულა და ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გაერთიანდნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

მმართველ გუნდსა და ოპოზიციას შორის საარჩევნო სისტემასთან დაკავშირებით დიპლომატების მედიატორობით მოლაპარაკებების ფორმატი დაიწყო. მოლაპარეკებათა ოთხი რაუნდი უკვე გაიმართა. მმართველმა გუნდი ოპონენტებს ახალ სამოქმედო გეგმას სთავაზობს. საუბარია იმაზე, რომ პარლამენტში პროპორციული წესით 100 დეპუტატი აირჩიონ, ნაცვლად 77-სა. ხოლო მაჟორიტარული მანდატები 50-მდე შემცირდება.