დიდმა ბრიტანეთმა 31 იანვარს, 23 საათზე [თბილისის დროით 03:00] ევროკავშირი ოფიციალურად დატოვა. BBC-ის ცნობით, ისტორიულ მომენტი ბრექსიტის მომხრეებმა ლონდონში, პარლამენტთან აღნიშნეს.

სადღესასწაულო განწყობის პარალელურად ბრექსიტის მოწინააღმდეგეებიც შეიკრიბნენ ევროკავშირის დროშებით და ქუჩაში სანთლები დაანთეს.

ფოტო: DOMINIC LIPINSKI/PA WIRE

ფოტო: AFP

პრემიერ-მინისტრმა ბორის ჯონსონმა პირობა დადო, რომ იგი ქვეყანას გააერთიანებს და წინ წაიყვანს. ტვიტერის გვერდზე გავრცელებულ ვიდეომიმართვაში ჯონსონი აღნიშნავს, რომ ბევრი ადამიანისთვის ეს არის იმედის წუთი და "წუთი, რომელიც ეგონათ, რომ არასოდეს დადგებოდა".

ჯონსონი მიმართავს მათ, ვისაც "შფოთვისა და დანაკარგის" შეგრძნება აქვს და მათაც, მისი აზრით, ყველაზე დიდ ჯგუფს, რომელიც ფიქრობს, რომ ამიერიდან "პოლიტიკური დაპირისპირება" არასოდეს დასრულდება:

"მე მესმის ყველა ეს გრძნობა და ჩვენი მთავრობის, პირადად ჩემი საქმეა, გავაერთიანო ეს ქვეყანა".

დიდი ბრიტანეთის დროშა უკვე ჩამოხსნეს ევროპარლამენტისა და ევროკავშირის საბჭოს შენობებიდან.

ფოტო: GETTY IMAGES

ფოტო: GETTY IMAGES

ამის შემდეგ იწყება 11-თვიანი გარდამავალი პერიოდი, იგივე ტრანზიტული პერიოდი, რა დროსაც ბრიტანეთი გააგრძელებს ევროკავშირის წესების დაცვას და მის ბიუჯეტში ფულის შეტანას.

ფაქტობრივად, გარდამავალ პერიოდში ბრიტანეთის მოქალაქეები ევროკავშირიდან გასვლას ვერც შეიგრძნობენ. თუმცა მნიშვნელოვანი იქნება 2021 წლის პირველი იანვარი, როდესაც ეს პერიოდი დასრულდება და დიდი ბრიტანეთი საბოლოოდ შეწყვეტს ევროკავშირის წესების გათვალისწინებას.

ამავე თემაზე: