საკრებულოს თავმჯდომარის მოადგილე, ირაკლი ზარქუა ამტკიცებს, რომ ლევან ხაბეიშვილს განზრახ თავს არავინ დასხმია. მისი თქმით, ეს რომ დაგეგმილი ყოფილიყო, საკრებულოს ლაბირინთებში უფრო მარტივი იქნებოდა.

"კამერების წინ ვინ აკეთებს ამას? ეს რომ ყოფილიყო განზრახვა, ხაბეიშვილს იქ სადმე გამოიჭერდნენ ან მე ან სხვა".

დღეს, 31 იანვარს საკრებულოს წევრებს ქართული ოცნებიდან, მათ შორის, ალექსანდრე ხუჯაძეს, ავთანდილ ცინცაძესა და თარაშ შურღაიას ბრალი წაუყენეს. ბრალდება წარდგენილია საქართველოს სისხლის სამართლის კოდექსის 126-ე პირველი პრიმა მუხლის "ბ" ქვეპუნქტით, რაც ჯგუფურ ძალადობას გულისხმობს.

24 იანვრის ბიუროს სხდომის დროს საკრებულოში ნაციონალური მოძრაობის დეპუტატს, ლევან ხაბეიშვილს სცემეს. ინციდენტის კადრებში ჩანს, რომ დეპუტატს ქართული ოცნების რამდენიმე დეპუტატმა სცემა. ხაბეიშვილის თქმით, იგი სატელევიზიო ეთერით კორუფციაზე საუბრის გამო სცემეს.

ინციდენტის შემდეგ ოცნების წევრები მომხდარის გამართლებას იმ არგუმენტით ცდილობდნენ, რომ ხაბეიშვილმა "ეს დაიმსახურა".

გარდა ამისა, მათ გააგრძელეს ხაბეიშვილის დისკრედიტაციაც.

შინაგან საქმეთა სამინისტრომ ლევან ხაბეიშვილის ცემის საქმეზე გამოძიება დაიწყო. საქმე აღიძრა სისხლის სამართლის კოდექსის 126-ე მუხლით, რაც ძალადობას გულისხმობს.